މާލެއިން ރަށަށް ދާން 5000 އެއްހާ މީހުން އެދިފައިވޭ: އަލީ ވަހީދު
މާލެއިން ރަށަށް ދާން 5000 އެއްހާ މީހުން އެދިފައިވާ ކަމަށް ޓޫރިޒަމް މިނިސްޓަރު އަލީ ވަހީދު ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން އަލީ ވަހީދު ވިދާޅުވީ، މާލޭގައި މިވަގުތު ދިރިއުޅެމުންދާ މީހުންގެ ތެރެއިން 5000 އެއްހައި މީހުން އެކި ތަންތަނަށް ފުރައިގެން ދާން ބޭނުންވެގެން އެކަން ހުށަހަޅާފައިވީ ނަމަވެސް ސަރުކާރުން އެދެނީ މި ދުވަސްވަރު އެއްވެސް މީހަކު އެއްވެސް ތަނަކަށް ދަތުރު ނުކުރުންކަމަށެވެ.
މިނިސްޓަރު ވިދާޅުވީ ދިރިއުޅުމުގެ ޙާލަތު ހުރިގޮތުން މިވަގުތު ރަށަށްދިއުމަށް ގިނަބަޔަކު އެދެމުންދާކަމަށާ، އެގޮތަށް މީހުން ފޮނުވާނީ މެނޭޖް ކަރަންޓީނެއްގައި ވަކި މުއްދަތަކު އެމީހުން ބޭތިއްބުމަށްފަހުކަމަށެވެ. މިގޮތަށް ނިންމާފައިވަނީ ރަށްރަށުގައި މިވަގުތު ތިބި ރައްޔިތުންގެ ސަލާމަތާއި ރައްކާތެރިކަމަށް ޓަކައިކަމަށް މިނިސްޓަރު ވިދާޅުވިއެވެ.
އެގޮތަށްދާ މީހުން ރަށަށް ދިއުމުގެ ކުރިން 14 ދުވަހު ކަރަންޓީން ކުރުމަށް މާލެ ސަރަހައްދުން ކޮޓަރިތަކެއް ހޯދަމުންދާކަމަށާއި، އެކަމަށް ޚާއްސަކޮށްގެން ހުޅުމާޅޭގެ ގެސްޓް ހައުސްތަކުން 500 ކޮޓަރި މިހާރުވެސް ހަމަޖައްސާފައިވާކަމަށް މިނިސްޓަރ އަލީ ވަހީދު ވިދާޅުވިއެވެ.
"އަޅުގަނޑު ގަބޫލުކުރާގޮތުގައި މާލޭގައި މިބަލިމަޑުކަން މިގޮތަށް އޮއްވާ ރަށްރަށަށް ދިއުމަކީ ރައްކާތެރިކަމެއްނޫން. އެހެން ނަމަވެސް ޒަރޫރީ ޙާލަތްތައް ކުރިމަތިވެފައިވާ އެތައް ރައްޔިތުންނެއް ތިބުމުން މި ޕްރޮސެސްވެސް އަޅުގަނޑުމެން ކުރިއަށްގެންދާނަން، މެނޭޖް ކަރަންޓީންއެއްގައި ކަރަންޓީން ކުރުމަށްފަހު." މިނިސްޓަރު އަލީ ވަހީދު ވިދާޅުވިއެވެ.
މި ނޫސްވެރިންގެ ބައްދަލުވުމުގައި ވާހަކަފުޅުދައްކަމުން ހޯމް މިނިސްޓަރ ޢިމްރާން ޢަބްދުﷲ ވިދާޅުވީ ރަށަށްދާން އެދިފައިވާ 5000 މީހުންގެ ތެރެއިން ފުރަތަމަ އިސްކަންދޭނީ އެންމެ ބޮޑަށް ބޭނުންޖެހިފައިވާ މީހުންނަށް ކަމަށެވެ. އެގޮތުން ފުރަތަމަ ކަރަންޓީންކުރާނީ ބޭސްފަރުވާއަށް މާލެ އައިސްތިބި މީހުންނާއި، އެންމެ ބޮޑަށް ޒަރޫރީ ބޭނުމަށް ޖެހިފައިވާ މީހުންކަމުގައި މިނިސްޓަރ އިމްރާން ވިދާޅުވިއެވެ.
