އެޑަމް: ރީތި މަންޒަރުތަކާއެކު އިންސްޓަގްރާމްގެ ރަސްކަމަށް
ބ.އޭދަފުއްޓަށް އުފަން އާދަމް ހަލީމް (އެޑަމް) އަކީ ދުނިޔޭގެ ހިތްފަސޭހަ ރީތި މަންޒިލްތަކަށް ދަތުރުކުރުމުގެ ޝައުގުވެރިކަން ހުންނަ ޒުވާނެކެވެ. އެޑަމްގެ އިންސްޓަގްރާމް ފީޑު ބަލައިލުމުން، އެކަން ވަރަށް ރަނގަޅަށް އެނގެ އެވެ. އެޑަމް އިޑިން ގެ ނަމުގައި ހަދާފައިވާ އިންސްޓަގްރާމް އެކައުންޓުން އޭނާގެ ދަތުރުނާމާ ފިސާރި ރަނގަޅަށް ވެސް ފެނެ އެވެ. ހުރިހާ މަންޒަރެއްވެސް އެހާ ނަލަ އެވެ. ހާއްސަކޮށް ރާއްޖޭގެ ހިތްގައިމު މަންޒަރުތަކެވެ.
އިންސްޓަގްރާމުގެ ދުނިޔޭގައި އެޑަމްއަކީ ތަފާތު މީހެކެވެ. ހާއްސަ މީހެކެވެ. އާއްމުންގެ ތެރޭގައި މާބޮޑު މަޝްހޫރުކަމެއް ލިބިފައި ނެތަސް އެއީ، އިންސްޓަގްރާމްގައި އެންމެ މަޤުބޫލު ދިވެހި ނަމެވެ. އޭނާގެ އިންސްޓަގްރާމް އެކައުންޓަކީ ރާއްޖޭގައި އެންމެ ގިނަ މީހުން ފޮލޯކުރާ އެއް އެކައުންޓެވެ. އެންމެ މަޤުބޫލު އިންސްޓަގްރާމް އެކައުންޓެވެ. އެގޮތުން އެޑަމްގެ ފޮލޯކުރާ މީހުންގެ އަދަދު އެއްލައްކަ ފަންސާސް ހާހަށް ވުރެ ގިނަ އެވެ. އެހެންކަމުން އެއީ އިންސްޓަގްރާމްގެ ދިވެހީންގެ ރަސްގެފާނޭ ނުބުނެވޭނެ ހަމަ އެއްވެސް ސަބަބެއްނެތެވެ.
"އެންމެ ކުޑަ އިރުވެސް ދަތުރު ކުރާ ހިތްވޭ، ރީތި ތަންތަން ބަލާލާ ހިތްވޭ، އެގޮތުން ރީތި މަންޒަރުތައް ފޮޓޯ ނަގައި، ގިނަ ބަޔަކަށް ދައްކާލަން ބޭނުންވަނީ، ހާއްސަކޮށް މި ރާއްޖޭގެ ގުދުރަތީ ރީތިކަން ދައްކާލުމަކީ ވަރަށް ބޮޑު އުފަލެއް" އަމިއްލަ ވިޔަފާރިވެސް ކުރާ އުމުރުން 34 އަހަރުގެ އެޑަމްގެ ވާހަކަތައް ހިއްސާކުރަމުން ބުންޏެވެ.
އެޑަމްއަކީ ބިޒީ ލައިފްއެއްގައި އުޅެމުން، އޭނާގެ އުންމީދުތައް ހަގީގަތަކަށް ހެދުމަށް ހިތްވަރު ކުރި ޒުވާނެކެވެ. އެހެން ޒުވާނުންނަށް ނަމޫނާއެއް ވެސް މެއެވެ. އާމްދަނީ ހޯދުމަށް އޭނާ އެންމެ ފުރަތަމަ ނުކުތީ ރިސޯޓް ލައިފްއަށެވެ. ރޫމް ބޯއީއެއްގެ ގޮތުގައި ވެލިގަނޑު އައިލެންޑް ރިސޯޓްގައި މަސައްކަތްކުރަމުން، އެޑަމްގެ އުންމީދުތައް ހަގީގަތަކަށް ހެދި އެވެ. އަމިއްލަ ފައިމައްޗަށް ތެދުވި އެވެ. ރަށުގައި ފެށި ވިޔަފާރިއާއެކު، އެޑަމްގެ ދަތުރުތައް ވެސް މެކުހަށްޖެހި އެވެ.
މިހާރު އެއީ ވިޔަފާރި ދަތުރުތަކާއިއެކު އޭނާ ދަތުރުކުރާ ރީތި މަންޒިލްތައް އެންމެނަށް ހިއްސާކުރާ، އިންސްޓަގްރާމްގައި ނުފޫޒު ގަދަ ފަރާތެކެވެ. އެގޮތުން ބޭރު ގައުމުތަކަށާއި، ރާއްޖޭގެ އެކި ރަށްރަށަށް އެޑަމް ކުރާ ދަތުރުތަކުގެ ދަތުރު ނާމާ އިންސްޓަގްރާމް ފީޑުން ވަރަށް ނަލަކޮށް ފެނެ އެވެ.
"މިހާރު ފުދޭ ވަރަކަށް އެކި ގައުމުތަކަށް ދަތުރު ކުރެވިއްޖެ. ވަރަށް ރީތި ތަންތަން ފެނިއްޖެ. މިހެން ކުރާ ދަތުރު ތަކުގެ ސަބަބުން ހިތްފަސޭހަ ތަންތަން ފެނުމުގެ އިތުރުން. އެތަންތާގައި އުޅޭ މީހުންގެ ދިރިއުޅުމުގެ ވައްޓަފާޅި ތަޖުރިބާ ކުރެވި، އާ ކަންކަން ދަސްވޭ" އެޑަމް ބުންޏެވެ.
އިންސްޓަގްރާމް މެދުވެރިކޮށް، ގިނަ ބަޔަކާ ހަމައަށް އެޑަމް އެންމެ ގިނައިން ގެނެސްދެނީ ރާއްޖޭގެ ރީތި މަންޒަރުތަކެވެ. ކޮންމެ ފޮޓޯއަކަށް އެތައް ސަތޭކަ ލައިކެއް ލިބެ އެވެ. ކޮމެންޓްތަކުން މީހުންގެ ޝައުޤުވެރިކަމާއި، އެޑަމްގެ މަސައްކަތް ބަލައިގެންފައިވާ މިންވަރު ހާމަވެ އެވެ.އެޑަމް ބުނީ އޭނާގެ އެންމެ ބޮޑު ބޭނުމަކީ ރާއްޖެ އިޝްތިހާރުކުރުން ކަމަށާއި އެކަން ކުރެވޭތީ ވަރަށް އުފާވާކަމަށެވެ.
"ވަރަށް ގިނަ މީހުން މެސެޖުކުރޭ ، ރާއްޖޭގެ އެންމެ ރީތި ތަންތަނަކީ ކޮބައިތޯ އަހާ ، އެމީހުންނަށް އެހީތެރިވެދެވޭތީ ވަރަށް އުފާވޭ" އެޑަމް ބުންޏެވެ.
ބިޒީކޮށް އުޅެމުން ދަތުރު ކުރުމަކީ އުނދަގޫ ކަމެކެވެ. ގޮންޖެހުން ބޮޑު ކަމެކެވެ. ބޭރު ގައުމުތަކަށް ކުރާ ދަތުރު ތަކަކީ ވިޔަފާރިއާއި ގުޅިފައިވާ ދަތުރުތަކެއް ނަމަވެސް، ރާއްޖޭގެ ރަށްރަށަށާއި، ރިސޯޓްތަކަށް އެޑަމް ދަތުރު ކުރަނީ ވަގުތު ހޯދައިގެންނެވެ. ރާއްޖޭގެ އެހާ ގިނަ ރަށްރަށަށް ދަތުރު ނުކުރެވުނު ނަމަވެސް، އޭނާގެ އިންސްޓަގްރާމް ފީޑުން ފެންނަ ރާއްޖޭގެ މަންޒަރުތައް ގިނަ އެވެ. ފުރިހަމަ ވެފައި، އެހާ ހިތްގައިމެވެ.
"ރާއްޖޭގެ މަންޒަރުތައް އެތައް ބަޔަކަށް ހިއްސާ ކޮށްދިނުމަކީ ވަރަށް ބޮޑު އުފަލެއް، މިކަމުގެ ސަބަބުން އަހަރެން ގަބޫލު ކުރަނީ އެތައް ބަޔަކަށް މިތަން އިޝްތިހާރުކޮށްދެވޭނެކަމަށް، އެތައް ބަޔަކު ރާއްޖޭގެ ރީތިކަމަށް ޝައުގުވެރިވާނެކަމަށް، އުންމީދުކުރަނީ ރާއްޖޭގެ ހުރިހާ ހިސާބަކަށްވެސް ދަތުރުކޮށް، މުޅި ރާއްޖޭގެ ރީތިކަން، ދައްކާލެވޭނެކަމަށް" ފަތުރުވެރިންނަށް ރާއްޖޭގެ ރީތިކަން ފޮޓޯތަކުން ދައްކުވައިދޭ އެޑަމް ބުންޏެވެ.
އެޑަމްގެ މަސައްކަތް ދުވަހެއް ދުވަހަކަށް ކުރި އަރަމުން އައުމަކީ އޭނާ އަށް މިއަދު ލިބޭ އެންމެ ބޮޑު ހިތްހަމަޖެހުމެވެ. ހާއްސަކޮށް ރާއްޖޭން ބޭރުގެ "ވެރިފައިޑް" ޕޭޖްތަކުން އެޑަމްގެ ފޮޓޯތައް ބޭނުންކުރުމަކީ ލިބޭ ބޮޑު އުފަލެކެވެ. އެވަރުން އަދި ނިމުނީކީ ނޫނެވެ. އެޑަމްއަކީ މިހާރު ދުނިޔޭގެ މަޝްހޫރު މީހުންގެ ލޯތަކަށް އަމާޒުވަމުން އަންނަ މޫނެކެވެ. އޭގެ ހެއްކަކީ ދުނިޔޭގެ މަގްބޫލު އިންސްޓަގްރާމް އެކައުންޓެއްގެ ބްރޭންޑް އެމްބަސަޑަރަކަށް އެޑަމް ހަމަޖެހިގެން ދިއުމެވެ.
މިދިޔަ މަހު އެޑަމް އަށް މި ޝަރަފް ލިބުނީ އާއްމު ސިއްޙަތާއި ގުޅޭގޮތުން ހިންގާ އެމެރިކާގެ "ގޮލީގަމީ" އިންސްޓަގްރާމް ޕޭޖުންނެވެ. އެޑަމް ގަބޫލުކުރާގޮތުގައި މި އުފަލަކީ އޭނާ ހިއްސާވާގޮތަށް ރާއްޖެއަށް ލިބުނު ޝަރަފެކެވެ. މި ފުރުސަތާއެކު އިތުރަށް ކުރިއަށްދާން އަޒުމު ކަނޑައަޅައިގެން ހުރި އެޑަމްގެ އަމާޒަކީ އެމެރިކާފަދަ ދުނިޔޭގެ ބޮޑެތި އާބާދީތަކުގައި ރާއްޖޭގެ ފަތުރުވެރިކަން މިހާރަށް ވުރެވެސް ބޮޑަށް އިޝްތިހާރުކުރުމެވެ.
އެޑަމްގެ އުންމީދުތައް ބޮޑެވެ. ދުނިޔޭގެ އެތައް މިތަނަށް ދަތުރު ކޮށްލަން ބޭނުންވެ އެވެ. މުޅި ރާއްޖޭގެ ރީތި މަންޒަރުތަކާއެކު އޭނާގެ އިންސްޓަގްރާމް ފީޑް ރީތިކުރަން ބޭނުންވެ އެވެ. ރާއްޖޭގެ އެންމެ މަގްބޫލު އިންސްޓަގްރާމް އެކައުންޓްގެ ވެރިފަރާތުގެ ގޮތުގައި އަބަދުވެސް ދެމި ހުންނަން ބޭނުންވެ އެވެ.
މީގެ ކުރީން މީޑިއާ އަކުން އެޑަމްގެ މޫނު ނުފެނުނަސް، އޭނާގެ ވާހަކަ ނުދެއްކިޔަސް، ގަބޫލުކުރަން ޖެހޭ ހަގީގަތަކީ އެޑަމްއަކީ އިންސްޓަގްރާމްގައި ރާއްޖޭގެ އެއް ވަނަ ކަމެވެ. އޭނާ ހުރީ އެ ޝަރަފާއެކު ދެގޮތެއްނުވެ، ކުރިޔަށް ދިއުމުގެ ފުރިހަމަ ހިތްވަރާއި އަޒުމުގަ އެވެ. އެޑަމްގެ ދޮޅު ލައްކައަށް ވުރެ ގިނަ ފޮލޯވާސް އަކީ އޭނާ އަށް މިކަން ކުރެވިދާނެކަމުގެ ފެންނަން އޮތް ހެއްކެކެވެ.
