ރިސޯޓްތަކުގައި ތިބި 600 އަށް ވުރެ ގިނަ މުވައްޒަފުން ރަށަށް ދާން އެދިފައިވޭ: އަލީ ވަހީދު
ރިސޯޓްތަކުގައި ތިބި 600 އަށް ވުރެ ގިނަ މުވައްޒަފުން ރަށަށް ދާން އެދިފައިވާ ކަމަށް ޓޫރިޒަމް މިނިސްޓަރު އަލީ ވަހީދު ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި މިނިސްޓަރު ވިދާޅުވީ އެ 600 މީހުންނަކީ މާލެ ވެސް ނައިސް، އަދި އިތުރު ކަރަންޓީނަކާ ވެސް ނުލައި ސީދާ ރަށަށް ދެވޭނެ މީހުން ކަމަށާއި އަރައު ފޭބުމުގެ ހުއްދަ ދީފައި ހުރި ރިސޯޓްތައް ކަމަށެވެ.
"އެ މީހުން ފޮނުވައިދޭނަން އިރާދަކުރެއްވިއްޔާ." މިނިސްޓަރު އަލީ ވަހީދު ވިދާޅުވިއެވެ.
މިނިސްޓަރު އަލީ ވަހީދު ވިދާޅުވީ ލޮކްޑައުން އާ ގުޅިގެން މާލޭގައި ތާށިވެގެން ރިސޯޓުތަކުގެ 153 މުވައްޒަފަކު ޓުއަރިޒަމް މިނިސްޓްރީއަށް ރިޕޯޓުކޮށްފައިވާ ކަމަށެވެ. އޭގެ ތެރެއިން 97 މީހަކު ކަރަންޓީނު ފެސިލިޓީތަކަށް ގެންގޮސްފައި ވާއިރު، 14 ދުވަހުގެ ކަރަންޓީނު މުއްދަތު ނިންމައިި، ކޮވިޑް19 އަށް ޓެސްޓުކުރުމަށްފަހު އެމީހުންނަށް އާއިލާތައް ކައިރިއަށް ދެވޭނެ ކަމަށެވެ.
ބާކީ ތިބި 56 މީހުން، ލޮކްޑައުނާ ގުޅިގެން ސަރުކާރުން ކުރިއަށްގެންދާ "މެނޭޖްޑް ކަރަންޓީން"ގެ ލިސްޓުގައި ހިމަނާނެ ކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ ރިސޯޓު މުވައްޒަފުންގެ އިތުރުން ވެސް ލޮކްޑައުން އާ ގުޅިގެން މާލޭގައި ތާށިވެފައި ތިބި މީހުންގެ ކަންކަން އިތުރަށް ހަރުދަނާ ކުރުމަށް ފެސިލިޓީތައް އިތުރުކުރުމުގެ މަސައްކަތް ކުރަމުން އަންނަ ކަމަށެވެ.
އެ މަސައްކަތުގެ ދަށުން އެފަދަ މީހުން ކަރަންޓީނު ކުރުމަށް މިހާރު 500 އެއްހާ ކޮޓަރި ހަމަޖައްސާފައިވާ ކަމަށް މިނިސްޓަރު މިއަދު ވިދާޅުވިއެވެ.
