ރެސިޕީ: މުގުރިހަ އެންމެ މީރު ވާނީ މިގޮތަށް ކެއްކުމުން
މުގު ރިހަ އަކީ ފަސޭހައިން އަވަހަށް ކައްކާލެވޭ އެއްޗެކެވެ. ހަމައެހާމެ ސިއްހަތަށް ފައިދާހުރި މީރު ރިހައެއްވެސް މެއެވެ. ތިރީގައި މި ހިމަނާލަނީ މުގުރިހަ އެންމެ މީރުކޮށް ކައްކާލެވޭނެ ރެސިޕީއެވެ.
ބޭނުންވާތަކެތި:
1 ފިޔާ
3 ލޮނުމެދު
10 ހިކަނދިފަތް
3 އިންޗީގެ ރާނބާ ފަތްކޮޅެއް
1 ޖޯޑު ބޯކިރު
½ ސައިސަމުސާ ރީނދޫ
3 ޖޯޑު ފެން
1 ޖޯޑު މުގު
1 ސައިސަމުސާ ލޮނު
½ ގިތެޔޮ މިރުސް (ނޫނީ ބޭނުން ވަރަކަށް)
½ ލުނބޯ
ހަދާނެގޮތް:
1. ފުރަތަމަ މުގުތައް ރަނގަޅަށް ދޮވެލާށެވެ.
2. އެއަށްފަހު ތެއްޔަކަށް ދޮވުނު މުގުކޮޅާއި 2 ޖޯޑު ފެން އަޅައި އުނދުން މައްޗަށް އުދާށެވެ.
3. މުގުކޮޅު މަޑުވަންދެން ކައްކާށެވެ. 20 ވަރަކަށް މިނެޓު މިކަމަށް ހޭދަވާނެއެވެ. މުގުކޮޅު ކެކެމުން ދާއިރު ތެލީގެ މައްޗަށް އަރަމުންދާ ހުދުކުލައިގެ ބައި ނަގަމުން ގެންދާށެވެ.
4. މުގުކޮޅު މަޑުވަމުން ދާއިރު ފިޔާކޮޅާއި ލޮނުމެދުކޮޅު ތުނިކޮށް ކޮށާލާށެވެ.
5. މުގުކޮޅު މަޑުވުމުން ފިޔާ، ލޮނުމެދުކޮޅު، ހިކަނދިފަތް، ރާނބާފަތް، ގިތެޔޮ މިރުސް، ރީނދޫ އަދި ބޯކިރު ކޮޅާއި 1 ޖޯޑު ފެނާއި ލޮނުކޮޅު އޭގެ ތެރެއަށް އަޅާލާ އެއްކޮށްލާށެވެ. ލުނބޯކޮޅުވެސް ފިތާލާށެވެ.
6. މަޑު ގިނީގައި 10 ވަރަކަށް މިނެޓު ވަންދެން ކައްކާލާށެވެ.
7. އުނދުން މަތިން ބޭލުމުގެ ކުރިން ލޮނު ހެޔޮވަރުކޮށްލާށެވެ.
