ރަށްތައް ވަކިން ހުރި ނަމަވެސް ހުރިހާ ރަށެއްގައި ވެސް ކޮވިޑް ފެތުރުން އެކަށީގެންވޭ: ނަޝީދު
ރާއްޖޭގައި ރަށްތައް ވަކިން ހުރި ނަމަވެސް ހުރިހާ ރަށެއްގައި ވެސް ކޮވިޑް-19 ފެތުރުން އެކަށީގެންވާ ކަމަށް މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަ ދައްކަވަމުން ނަޝީދު ވިދާޅުވީ ދިވެހިރާއްޖެ އެއް ގައުމެއްގެ ގޮތުގައި ތުރާކުނުން ފެށިގެން އައްޑޫ މުއްޔާ ހަމައަށް މިއޮތީ ދަތުރުކުރާލެއް ގިނަ ކަމުން ކަމަށާއި، އެއް ތަނުން އަނެއް ތަނަށް މީހުން ގޮސް އުޅޭތީ ކަމަށެވެ.
"އެހެންވީމަ އެއް ތަނެއްގައި ހުރި އެއްޗެއް އަބަދުވެސް އަނެއް ތަނަކަށް ފެތުރިގެން ދޭ. އެއީ ޒަމާނުއްސުރެ މި ދިވެހިރާއްޖޭގައި އެކަން ހިނގަމުން އަންނަ ގޮތް" ނަޝީދު ވިދާޅުވިއެވެ.
ނަޝީދު ވިދާޅުވީ، ރައްޔިތުންގެ މިހާރު އެންމެ ބޮޑު ކަންބޮޑުވުމެއްގެ ގޮތުގައި އޮތީ މާލޭގައި ތާށިވެފައި ތިބި ފަރާތްތަކަށް ރަށްރަށަށް ނުދެވުމުގެ ޝަކުވާ ކަމަށެވެ.
ނަމަވެސް މާލޭގައި ބަލި ފެތުރެމުން އަންނަ މިވަގުތުގައި މާލެއިން އަތޮޅުތަކަށް މީހުން ދިޔުމަކީ ބަލި ނެތް ރަށްތަކަށް ބަލި ފެތުރުމުގެ ފުރުސަތު ބޮޑުވާނެ ކަމަށް ވާތީ، ރަށްރަށަށް މީހުން ފޮނުވުމުގެ އުސޫލު ވަނީ ހަރުކަށިކޮށްފަ އެވެ.
ނަޝީދު ވަނީ ހުރިޙާ ރަށަކުން ވެސް ބައްޔަށް ރައްކާތެރިވެ ތައްޔާރަށް ތިބުމަށް އެދިވަޑައިގެންފައެވެ.
މިހާތަނަށް ރާއްޖެއިން 897 މީހަކު ކޮވިޑަށް ފައްސިވެފައިވާއިރު ބަލިން ރަނގަޅުވެފައި ވަނީ 31 މީހެކެވެ. އަދި ބަލީގައި ތިން މީހަކު ވަނީ މަރުވެފަ އެވެ.
