ކޮވިޑްގެ ކަންކަމަށް މިހާތަނަށް 814 މިލިއަން ރުފިޔާ ހަރަދު ކޮށްފި
ކޮވިޑް-19ގެ ޙާލަތުން އަރައިގަތުމަށް މިހާތަނަށް 814 މިލިއަން ރުފިޔާ ހަރަދުކޮށްފައިވާ ކަމަށް ފިނޭންސް މިނިސްޓްރީން ހާމަކޮށްފިއެވެ.
ފިނޭންސް މިނިސްޓްރީން ޢާއްމުކުރައްވާފައިވާ "ކޮވިޑް ވީކްލީ ސްޕެންޑިން" ރިޕޯޓުގައިވާ ގޮތުން މިދިޔަ ބުރާސްފަތި ދުވަހުގެ ނިޔަލަށް ކޮވިޑް-19ގެ ހާލަތުން އަރައިގަތުމަށް 814.2 މިލިއަން ރުފިޔާ ވަނީ ހަރަދުކޮށްފައެވެ.
މީގެކުރިން ފިނޭންސް މިނިސްޓްރީން މި ރިޕޯޓު ޢާންމުކުރައްވާފައިވަނީ 30 އޭޕްރީލްގައެވެ. އެ މުއްދަތާ ހަމައަށް ސަރުކާރުން މިކަމަށް ޚަރަދުކޮށްފައިވަނީ 665.4 މިލިއަން ރުފިޔާއެވެ. އެހެންކަމުން މި މަހުގެ މިހާތަނަށް އެކަނިވެސް 148.8 މިލިއަން ރުފިޔާ ވަނީ ހަރަދު ކޮށްފައެވެ.
ފިނޭންސް މިނިސްޓްރީން ޢާންމުކުރި ރިޕޯޓްގައި ވާ ގޮތުން މިހާތަނަށް އައިރު ކޮވިޑް-19ގެ ކަންކަމުގައި މިހާތަނަށް އެންމެ ބޮޑު ހަރަދެއް ކޮށްފައި ވަނީ ޑިޒާސްޓަރ މެނޭޖްމަންޓް އޮތޯރިޓީ(އެންޑީއެމްއޭ)ގެ މަސައްކަތްތަކަށެވެ. އެގޮތުން މި ސެންޓަރުގެ މަސައްކަތް ތަކަށް 525.4 މިލިއަން ރުފިޔާ ވަނީ ހޭދަވެފައެވެ.
ދެން އެންމެ ބޮޑު ހޭދައެއް ކުރައްވާފައިވަނީ ހެލްތު މިނިސްޓްރީންނެވެ. އެ މިނިސްޓްރީން ވަނީ 135.7 މިލިއަން ރުފިޔާ ހަރަދުކޮށްފައެވެ. މީގެ އިތުރުން ޕްލޭނިންގް މިނިސްޓްރީގެ މަސައްކަތްތަކަށް 27.9 މިލިއަން، އެމްއެންޑީއެފްގެ މަސައްކަތްތަކަށް ހަ މިލިއަން، ފޮރިން މިނިސްޓްރީގެ މަސައްކަތަކަށް 3.5 މިލިއަން އަދި ނެޝަނަލް ސޯޝަލް ޕްރޮޓެކްޝަން އޭޖެންސީ(އެންސްޕާ)ގެ މަސައްކަތްތަކަށް 2.9 މިލިއަން ރުފިޔާ ވަނީ ޚަރަދުކޮށްފައެވެ.
މި ދަނޑިވަޅުގައި އެންމެ ބޮޑު ހޭދައެއް ކޮށްފައިވަނީ މިބައްޔަށް ފަރުވާ ކުރަން ބޭނުންވާ ތަކެއްޗާއި، ޚިދުމަތްތައް ހޯދުމަށްކަމަށް މި ތަފާސްހިސާބުތަކުން ދައްކައެވެ. އެގޮތުން މި ތަކެތި ހޯދަން މިހާތަނަށް 389.7 މިލިއަން ރުފިޔާ ވަނީ ހަރަދުކޮށްފައެވެ. މީގެ އިތުރުން ގްރާންޓްތަކުންނާއި ސަބްސިޑައިޒްކޮށްގެން 110.9 މިލިއަން ރުފިޔާ ވަނީ ޚަރަދުކޮށްފައެވެ.
މި ދަނޑިވަޅުގައި ކަރަންޓީން ފެސިލިޓީތަކާއި އައިސޮލޭޝަން ފެސިލިޓީތައް ތަރައްޤީކުރުމަށް ސަރުކާރުން ދަނީ ބޮޑެތި ޚަރަދުތަކެއް ކުރައްވަމުންންނެވެ. އެގޮތުން މިހާތަނަށް އައިރު މިފަދަ ކަންކަން ކުރުމަށް 54.5 މިލިއަން ރުފިޔާ ވަނީ ޚަރަދުކުރައްވާފައެވެ. މި ދަނޑިވަޅުގައި ސިއްޙީ އާލާތްތައް މަރާމާތުކުރުމާއި ތަންތަން މަރާމާތުކޮށް ބެލެހެއްޓުމަށް ޖުމުލަ 7.4 މިލިއަން ރުފިޔާ ވަނީ ޚަރަދުކުރައްވާފައެވެ.
މިހާތަނަށް އައިރު ޑިޒާސްޓަރ މެނޭޖްމަންޓް ފަންޑުން ވަނީ 84.1 މިލިއަން ރުފިޔާ ޚަރަދުކުރައްވާފައެވެ. މީގެ އިތުރުން ޓުއަރިޒަމް އެކްޓިވިޓީސް އިމްޕލިމެންޓޭޝަން ފަންޑުން ވަނީ 24.7 މިލިއަން ރުފިޔާ ޚަރަދުކުރައްވާފައެވެ. އަދި މި މުއްދަތުގައި ޒަކާތު ފަންޑުންވަނީ 3 މިލިއަން ރުފިޔާ ޚަރަދުކުރައްވާއެވެ.
