ސިފައިންގެ ކޮމާންޑަރުގެ ކޮޓަރިއަށް ޑޮކްޓަރު ވަތް މައްސަލަ ފުލުހުން ބަލަން ފަށައިފި
އއ. ވެލިދޫ ކަރަންޓީނު ފެސިލިޓީގައި ސިފައިންގެ ކޮމާންޑަރެއްގެ ކޮޓަރިއަށް ޑޮކްޓަރަކު ވަތް މައްސަލަ ފުލުހުން ބަލަން ފަށައިފިއެވެ.
ރޭ ވަނީ ބައެއް މީޑިއާތަކުން ރިޕޯޓުކޮށްފަވާ ގޮތުގައި ވެލިދޫ ފެސިލިޓީއާ ހަވާލުވެ ހުންނެވި ސިފައިންގެ އެންމެ އިސް ކޮމާންޑަރާއި، އެ ފެސިލިޓީގެ އަންހެން ޑޮކްޓަރަކު ދަންވަރު އެކަހެރިކޮށް ބައްދަލުކުރި މައްސަލައެއް ފެންމަތިވެ، ފުލުހުން އެ މައްސަލަ ބަލަމުން އަންނަ ކަމަށެވެ.
ނަމަވެސް ފުލުހުންގެ ތަރުޖަމާނު އިޒްމިއާ ޒާހިރު ރޭ ވިދާޅުވީ އއ. ވެލިދޫ ކަރަންޓީން ފެސިލިޓީގައި ޖިނާއީ ކުށެއް، އަދި ޖިންސީ ފުރައްސާރައިގެ މައްސަލައެއް ހިނގައިގެން ފުލުހުންނަށް ހުށަހެޅިފައެއް ނުވާ ކަމަށާއި އަދި ފުލުހުން އެފަދަ ކަމެއް ތަހުގީގު ކުރަމުން ނުދޭ ކަމަށެވެ.
އެހެން ނަމަވެސް ދާދި ދެންމެ އަކު ފުލުހުން ބުނީ މި މައްސަލަ މިހާރު ބަލަމުންދާ ކަމަށެވެ. އިތުރު ތަފްސީލެއް ހާމަކޮށްފައެއް ނުވެއެވެ.
މީޑިއާތަކުން ރިޕޯޓުކޮށްފައިވާ ގޮތުގައި އެ މައްސަލަ ފެންމަތިވީ، ކޮމާންޑަރުގެ ކޮޓަރިން، އަންހެން ޑޮކްޓަރު ނުކުންނަނިކޮށް، އެ ފެސިލިޓީގެ ސެކިއުރިޓީއަށް ފެނިގެން ކަމަށެވެ.
Ads by STO
