ކޮވިޑަށް ފައްސިވި ސިފައިންގެ އަދަދު 40 އަށްވުރެ މައްޗަށް އަރައިފި
ކޮވިޑް-19އަށް ފައްސިވި ސިފައިންގެ އަދަދު 40 އަށްވުރެ މައްޗަށް އަރައިފިއެވެ.
ދައުލަތުގެ މީޑިއާ ޕީއެސްއެމްއަށް ދެއްވި އިންޓަވިއުއެއްގައި ޗީފް އޮފް ޑިފެންސް ފޯސް އަބްދުﷲ ޝަމާލު ވިދާޅުވީ އެމްއެންޑީއެފަކީ މިހާތަނަށް އެންމެ ގިނަ މީހުން އެއް މުއައްސަސާއަކުން އެ ބައްޔަށް ފައްސިވި ތަން ކަމަށެވެ. އެގޮތުން މިހާރުވެސް 40 އަށްވުރެ ގިނަ ސިފައިން ކޮވިޑް-19 އަށް ފައްސިވެފައި އެބަ ތިބި ކަމަށް ޝަމާލް ވިދާޅުވިއެވެ.
"ހަގީގަތުގައި އަޅުގަނޑުމެން އެކްސްޕެކްޓް ކުރަން އެކަން، އަދިވެސް ފައްސިވާނެ ސިފައިން، އެހެން ނަމަވެސް ސިފައިން ރައްކާތެރި ކުރުމަށްޓަކައި ފޯސް ޕްރޮޓެކްޝަން ވަރަށް ގިނަ މަސައްކަތްތަކެއް ކުރެވިފައި ހުރީ". ޝަމާލް ވިދާޅުވިއެެވެ.
އެގޮތުން ސިފައިންވެސް މި ބައްޔަށް ހޭލުންތެރި ކުރުމާއި، ސިފައިންނަށް ތަމްރީން ދިނުމާއި އޭގެ އިތުރުން، ވަކި ވަކިން ސިފައިންގެ ތެރޭގައިވެސް ކަރަންޓީންކޮށް އައިސޮލޭޓް ކުރެވޭ ގޮތާއި ގުޅޭގޮތުންވެސް ވާހަކަދެކެވި މަޝްވަރާ ކުރެވި އެ ފިޔަވަޅުތައް އެޅެމުންދާކަން ޝަމާލް ވިދާޅުވިއެވެ.
ކޮވިޑާ ގުޅިގެން ރައްޖޭގެ ހާލަތަށް އަންނަ ބަދަލުތަކާއެކު ކުރިއަށް އޮތް ހަފްތާގައި އަންނާނެ ކަމަށް ލަފާކުރާ ސާޖުގައި އެންމެ ގިނަވާނެ އެއް ބަޔަކީ ސިފައިންނަށް ވެދާނެ ކަމަށް ޝަމާލް ވިދާޅުވިއެވެ.
ޝަމާލް ވިދާޅުވީ، ސިފައިންގެ ތެރޭގައި ހިތްވަރާއި ޖޯޝު ވަރަށް ވަރުގަދަ ކަމަށާއި، ސިފައިން ތިބީ މިކަމުގައިއެހެން މުވައްސަސާތަކާއި އެކީގައި ވަރަށް ފޯރީގައި މަސައްކަތްކުރުމަށް ޝަމާލް ވިދާޅުވިއެވެ.
ޝަމާލް ވިދާޅުވީ، ސިފައިން ފްރަންޓްލައިންގައި މަސައްކަތް ކުރަނީ، ހުރިހާ ކަމެއް އެނގި ތިބެ ކަމަށާއި، ހާލަތަށް ފުރިހަމައަށް ތައްޔާރުވެ ތިބެގެން ކަމަށެވެ. އޭނާ ވިދާޅުވީ، ކޮވިޑާ ގުޅިގެން ހަރަކާތްތެރިވާ އެހެން ފަރާތްތަކެކޭ އެއްގޮތަށް ސިފައިންވެސް ހަރަކާތްތެރިވަނީ ޕްރޮޓެކްޓިކް ގިއާއާއި ސަލާމަތާއި ރައްކާތެރިކަމުގެ ގޮތުން އަޅަން ޖެހޭ ފިޔަވަޅުތަކާ އެކުގައި ކަމަށެވެ. ނަމަވެސް މީހަކު ބަލިވެ ނުވަތަ ފައްސި ވުމަކީ އޮތް ފުރުސަތެއް ކަމަށް އޭނާ ވިދާޅުވިއެވެ.
