ވޯލްޑް ޓްރެވަލް އެވޯޑްސްއިން ދޭ އެންމެ ޝަރަފުވެރި އެވޯޑު ފުރަތަމަ ފަހަރަށް ރާއްޖެއަށް ލިބިއްޖެ
ވޯލްޑް ޓްރެވަލް އެވޯޑްސްއިން ދޭ އެންމެ ޝަރަފުވެރި އެވޯޑު ކަމުގައިވާ "ވޯލްޑްސް ލީޑިން ޑެސްޓިނޭޝަން" އެވޯޑް ފުރަތަމަ ފަހަރަށް ރާއްޖެއަށް ލިބިއްޖެއެވެ.
ވޯލްޑް ޓްރެވަލް އެވޯޑްސްގެ 40 ކެޓަގަރީއަކުން ދިވެހިރާއްޖެ ވަނީ ނޮމިނޭޓް ވެފައެވެ. 30 ކެޓަގަރީއަކުން ރާއްޖޭގެ 50 ރިސޯޓަކާއި ހޮޓާތައް ނޮމިނޭޓް ވެފައިވާއިރު ވޯލްޑް ކެޓަގަރީގެ ތިން ކެޓަގަރީއެއްގައި ރާއްޖޭގެ ތިން ރިސޯޓެއް ދުނިޔޭގެ އެންމެ މަތީ ފަންތީގެ ހިދުމަތްދޭ ތަންތަނާ ވަނީ ވާދަ ކޮށްފައެވެ.
ފަތުރުވެރިންގެ އެންމެ މަގުބޫލުކަން ހޯދާފައިވާ 22 މަންޒިލަކާ ރާއްޖެ ވަނީ ވާދަ ކޮށްފައެވެ. އެހެން ގައުމުތަކުގެ ތެރޭގައި ދުބާއީ، މެލޭޝިޔާ، ސްޕެއިން، މޮރިޝިއަސް އަދި ސްރީލަންކާ ހިމެނެއެވެ.
މި ލިބުނު ޝަރަފާއެކު ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް ވަނީ މަރުހަބާ ދަންނަވާފައެވެ.
އެގޮތުން ރައީސް ސޯލިހް ކުރެއްވި ޓްވީޓެއްގައި ވިދާޅުވީ މި އެވޯޑް ރާއްޖެއަށް ލިބުމުން އުފާކުރައްވާ ކަމަށާއި މިއީ ކޮވިޑް-19 މި ހާލަތުގައި ވެސް ރާއްޖެއަށް ފަތުރުވެރިން ގެނައުމަށް ފަތުރުވެރިކަމުގެ ސިނާއަތުގައި މަސައްކަތްކުރާ މަސައްކަތްތެރީން ކުރެއްވި ބުރަ މަސައްކަތުގެ ނަތީޖާ ކަމަށް ރައީސް ވިދާޅުވިއެވެ.
މި އެވޯޑް ރާއްޖެއަށް ލިބުނުކަން އިއުލާން ކޮށްފައި ވަނީ ވާޗުއަލްކޮށް ބޭއްވި ވޯލްޑް ޓްރެވަލް އެވޯޑްސް 2020ގެ ގްރޭންޑް ފިނާލޭ ހަފްލާގައެވެ.
