ކައިވެނިކުރަން އެއްކުރި ލާރިކޮޅު ކޮވިޑް ފަންޑަށް
ކޮވިޑް19 އާއި ގުޅިގެން އެތައް ބަޔަކު ކައިވެނި ފަސްކޮށްފައިވާއިރު، އިންޑިއާ ދެ ޖޯޑަކު ކައިވެންޏަށް އެއްކުރި ލާރިކޮޅު ކޮވިޑް19 ފަންޑަށް ހަދިޔާކޮށްފިއެވެ.
ކައިވެނީގެ ހަފްލާ ކެންސަލް ކޮށް، މި ދެޖޯޑު ވެސް ވަނީ ކޯޓު މެދުވެރިކޮށް ކައިވެނި ބާއްވާފައެވެ.
ޖޯތީ ރަންޖަން އާއި ރޯޖަލިން ރަންޖަން ވަނީ އެދެ މީހުން ކައިވެނި ކުރަން އެއްކުރި 10 ހާހަށް ވުރެ ގިނަ ރުޕީސް ޗީފް މިނިސްޓަރުގެ ރިލީފް ފަންޑަށް ހަދިޔާކޮށްފައެވެ. އަދި އާޝީޝް ރަންޖަން އާއި ވައިޝާލީ ވެސް ވަނ ކައިވެންޏަށް އެއްކުރި 40 ހާސް ރުޕީސް މި ފަންޑަށް ހަދިޔާކޮށްފައެވެ.
އިންޑިއާ ޓައިމްސް އަށް މައުލޫމާތު ދެމުން ޖޯތީ ބުނި ގޮތުގައި ކައިވެނީގެ ހަފްލާ ކެންސަލް ކުރުމާމެދު ވަރަށް ކަންބޮޑުވި ކަމަށެވެ. ކައިވެނިގެ ހަފްލާއަކި ހުރިހާ މީހުނަށް ވެސް ހާއްސަ ދުވަހެއް ކަން ފާހަގަކޮށް ޖޯތީ އިތުރަށް ބުނީ ނަމަވެސް އެމީހުން ކައިވެނި ކުރީ ވަރަށް ވެސް ކުޑަ ހަފްލާއެއްގައި ކަަމަށެވެ. އެ ހަފްލާއަށް އާއިލީ މީހުނާއި ރައްޓެހިންނަށް ވެސް ދައުވަތު ދީފައެއް ނުވެއެވެ. އަދި ކައިވެންޏާއި ގުޅިގެން ބޮޑު ޖާފަތެއްވެސް ނުބާއްވަން ކަމުގައި ޖޯތީ ބުނެފައެވެ.
ކައިވެންޏަށް ފަހު މި ދެމީހުން ވަނީ އަވަށުގެ ޕޮލިސް އިންސްޕެކްޓަރ އަށް ދައުވަތު ދީ ފައިސާ ހަދިޔާ ކޮށްފައެވެ،
އެ އަދަދަކީ ވަރަށް ކުޑަ އަދަދެއް ކަމަށް ގަބޫލު ކުރާ ކަމަށާއި ނަމަވެސް އެއީ ކައިވެނި ހަފްލާއަށް ހަރަދުވެގެން ދާނެ ފައިސާ ކަމަށް ވެސް ޖޯތީ އިތުރަށް ބުނެފައިވެއެވެ. އަދި މި ދަނޑިަޅުގައި އެ ފައިސާ ހަދިޔާ ކުރަން ލިބުނީތީ އުފާ ކުރާ ކަމަށް ވެސް އޭނާ ބުނެފައިވެއެވެ.
