ހުން ދެނެގަންނަ ޓްރެކަރ އަކާއެކު ބެއިޖިން ގެ ސްކޫލުތައް ހުޅުވައިފި
ކުއްޖާ ހުސް އައިސްފައި ހުރިނަމަ އެލާތު ފޮނުވައިދޭ ޓްރެކަރަކާއެކު ޗައިނާގެ ބެއިޖިންގެ ސުކޫލުތައް ހުޅުވައިފިއެވެ.
މި ޓްރެކަރުތަކަކީ ބްރޭސްލެޓެއްގެ ގޮތުގައި ކުއްޖާގެ އަތުގައި އަޅާ އެއްޗެކެވެ. އަދި ކުއްޖާގެ ފިނި ހޫނުމިން ވަކި ވަރަކަށް ވުރެ މައްޗަށް ދާ ނަމަ މި ޓްރެކާ އިން އެލާޓުކޮށްދޭނެއެވެ. މި ބްރޭސްލެޓުތައް ދަނީ ބެއިޖިންގެ 5 ސުކޫލެއްގެ ކުދިން ބޭނުން ކުރަމުންނެވެ.
މި ބްރޭސްލެޓުން ރެކޯޑު ކުރާ ފިނި ހޫނު މިން އެޕެއް މެދުވެރިކޮށް ސުކޫލުން އަދި ބެލެނިވެރިންނަށް ވެސް ފެންނާނެއެވެ. ފިޓްނެސް ޓްރެކާ އެއް ގޮތަށް އިންނަ މި ބްރޭސްލެޓު ހުރިހާ ވަގުތެއްގައި އެޅުމަށް ވެސް ބެއިޖިން ގެ ޓީޗަރުން ވަނީ ކުދިންނަށް ލަފާދީފައެވެ.
މާހިރުން ބުނާ ގޮތުގައި ޗައިނާ އިން ދަނީ ކޮވިޑް19 އިން ފިލާވަޅު ލިބިގަނެ، ޓެކްނޮލޮޖީގެ އެހީގައި ވައިރަސް އަލުން ފެތުރުނަ ނުދިނުމަށް ހުރި ހުރިހާ ކަމެއް ކުރަމުންނެވެ.
އެގޮތުން ޗައިނާ އިން ވަނީ އާންމުން މީހުން އެއްވެ އުޅޭ ސަރަހައްދުތަކުގައި ހުން ދެނެގަންނަ ކެމެރާ ތައް ވެސް ހަރުކޮށް ބޭނުން ކުރަމުންނެވެ. ހަމައެހެންމެ ޗައިނާގެ ގިނަ ތަންތަކުން ދަނީ މީހާއަށް ކޮވިޑް19 ގެ ރިސްކު ހުރި މިންވަރު ދައްކައިދޭ އެޕްއެއް ވެސް ބޭނުން ކުރަމުންނެވެ. މި އެޕުން، މީހާގެ ޓްރަވެލް ހިސްޓްރީ އާއި އެހެނިހެން ކަންތައްތަކަށް ބަލައި ރަތް، ފެހި އަދި ރީނދޫ އެލާޓް ދައްކައިދެއެވެ.
