މެޖޯރިޓީ އޮވެ، ޝިޔާމްގެ އިސްލާހު ބަލައި ބަލައިނުގަތުމުން ރައްޔިތުން ހިތްހަމައެއް ނުޖެހޭނެ: ޣައްސާން
ސަރުކާރުގެ ބޮޑު މެޖޯރިޓީ އެއް މަޖިލީހުގައި އޮވެ، ނައިފަރު ދާއިރާގެ މެމްބަރު އަހުމަދު ޝިޔާމް ހުށަހެޅުއްވި އިސްލާހު ބަލައި ބަލައިނުގަތުމުން ރައްޔިތުން ހިތްހަމައެއް ނުޖެހޭނެ ކަމަށް ތ.ގުރައިދޫ ދާއިރާގެ މެމްބަރު ޣައްސާން މައުމޫން ވިދާޅުވެއްޖެއެވެ.
އެކި ބޭނުންތަކަށް މާލެ އައި މީހުންގެ ތެރެއިން ލޮކްޑައުންގެ ސަބަބުން އަނބުރާ ރަށަށް ނުދެވި މާލޭގައި ތާށިވެފައި ތިބި މީހުންގެ ހަރަދުތައް ސަރުކާރުން ހަމަޖައްސައިދިނުމަށް ޝިޔާމް ހުށަހެޅުއްވި ހުށަހެޅުން ރައްޔިތުންގެ މަޖިލީހުން މިއަދު ވަނީ ފާސްނުކޮށް ބޭރުކޮށްލާފައެވެ.
ޗެނަލް13 އަށް ދެއްވި އިންޓަވިއުއެއްގައި ޣައްސާން ވިދާޅުވީ ކޮވިޑް-19އާ ގުޅިގެން ބޮޑު ހަރަދުތަކެއް ސަރުކާރުން ކުރަމުންދާ މި ދަނޑިވަޅުގައި ޝިޔާމް ހުށަހެޅުއްވި ދެ އިސްލާހު ފާސްނުކުރުމަކީ ހިތާމަކުރަން ޖެހޭ ކަމެއް ކަމަށެވެ. އަދި ސިންގަޕޫރު ފަދަ ގައުމުތަކުން ވަޒީރުންގެ މުސާރަ ނެގުން ހުއްޓާލުމަށް ފަހު ފްރޮންޓްލައިންގައި މަސައްކަތް ކުރަމުންދާ ފަރާތްތަކަށް އެލެވެންސް ދެމުންދާ ކަމަށް ވެސް ޣައްސާން ފާހަގަ ކުރެއްވިއެވެ.
"ފްރޮންޓްލައިންގައި މަސައްކަތް ކުރާ ފަރާތްތަކުގެ އަގު ސަރުކާރުން ވަޒަން ކުރާ ކަމުގެ ކުޑަ ރަމްޒެއްގެ ގޮތުން ނަމަވެސް އެލަވެންސެއް ދިނުމަށް ދިވެހި ހުރިހާ ރައްޔިތުން ވެސް ބޭނުންވާނެ. މަޖިލީހުގައި ސަރުކާރުގެ ބޮޑު މެޖޯރިޓީއެއް އޮވެމެ ޝިޔާމުގެ ހުށަހެޅުން ފާސްކޮށް ނުދިނުމަކީ ރައްޔިތުން ހިތްހަމަނުޖެހި ވަރަށް ފުންކޮށް ވިސްނާނެ ކަމެއް ކަން ޔަގީން" ޣައްސާން ވިދާޅުވިއެވެ.
މަޖިލިހުގެ ހިއުމަން ރައިޓްސް އެންޑް ޖެންޑާ ކޮމިޓީން ތައްޔާރުކުރި ރިޕޯޓު ފާސްކުރުމުގެ ކުރިން އެރިޕޯޓަށް ޝިޔާމު ހުށަހެޅުއްވި ދެ އިޞްލާޙުވެސް މަޖިލިހުން ވަނީ ބަލައިނުގަންނަން ނިންމާފައެވެ. އެއިސްލާހުތަކުގެ ތެރެއިން ފުރަތަމަ އިސްލާހަކީ އިސް ސަފުގެ މަސައްކަތްތެރިންނަށް ހާއްސަ ރިސްކް އެލަވެންސެއް ދިނުމަށް ހުށަހެޅުއްވި ހުށަހެޅުއްވުމެވެ.
ދެވަނަ ހުށަހެޅުމަކީ މާލޭގައި ތާށިވެފައި ތިބި މީހުނަށް މާލޭގައި ތިބޭ މުއްދަތުގައި އެ މީހުންގެ އަތުން ދާ ހަރަދުތައް ސަރުކާރުން ދިނުމަށެވެ.
އެ ދެ އިސްލާހު ވެސް ފެންނަ ކަމަށް ވޯޓު ދެއްވީ 12 މެންބަރުންނެވެ. އިސްލާހު ފާސްކުރަން ނުފެންނަ ކަމަށް 40 މެންބަރަކު ވޯޓު ދެއްވި އެވެ. އެހެންކަމުން އެއިން އެއްވެސް އިސްލާހެއް ފާހެއް ނުވެ އެވެ.
