ރާއްޖެ އިޝްތިހާރު ކުރުމަށް 412 ޙަރަކާތެއް މިއަހަރު ކުރިއަށްގެންދެވިއްޖެ: ޠައްޔިބު
މިއަހަރުގެ ތެރޭގައި ރާއްޖެ އިޝްތިހާރު ކުރުމަށް 412 ޙަރަކާތެއް ކުރިއަށް ގެންދެވިފައިވާ ކަމަށް މޯލްޑިވްސް މާކެޓިންގ އެންޑް ޕަބްލިކް ރިލޭޝަން ކޯޕަރޭޝަން، އެމްއެމްޕީއާރުސީގެ މެނޭޖިންގ ޑިރެކްޓަރ ޠައްޔިބު މުޙައްމަދު ވިދާޅުވެއްޖެއެވެ.
ޠައްޔިބު މިހެން ވިދާޅުވީ ދައުލަތުގެ މީޑިއާ "ޕީއެސްއެމް" އިން ގެނެސްދިން ޕްރޮގްރާމެއްގައި ވާހަކަ ދައްކަވަމުންނެވެ.
އެގޮތުން އޭނާ ވިދާޅުވީ މިއަހަރުގެ ތެރޭގައި ރާއްޖެ އިޝްތިހާރު ކުރުމަށް ގިނަ މަސައްކަތްތަކެއް ކުރެވިފައިވާ ކަމަށާއި އެގޮތުން ޓްރަވެލް އެޖެންޓުން އޮންލައިންކޮށް ތަމްރީނު ކުރުން ހިމެނޭކަން އޭނާ ފާހަގަކުރެއްވިއެވެ.
އޭނާ ވިދާޅުވީ މި ތަމްރީނު ތަކުގެ ތެރެއިން ޓްރަވެލް އެޖެންޓުންނަށް ރާއްޖޭގެ ކަންކަން ކިޔައިދީ ރާއްޖޭގައި ތަޖުރިބާ ކުރެވޭނެ ކަންކަން ވެސް ކިޔައިދީފައިވާ ކަމަށެވެ.
މީގެ އިތުރުންވެސް ރާއްޖެ ޕްރޮމޯޓު ކުރުމުގެ ގޮތުން ދުނިޔޭގެ އެންމެ ބޮޑެތި އެއާލައިންތަކާ ގުޅިގެން މަސައްކަތްތަކެއް ފަށާފައިވާކަން ވެސް ތައްޔިބް ފާހަގަ ކުރެއްވިއެވެ. އެގޮތުން އެ ކެމްޕެއިން ޤަތަރު އެއަރވޭސް، ސިންގަޕޯރ އެއަރލައިން، އަދި އިއްތިހާދު އެއަރލައިން އާއެކު ފަށާފައިވާ ކަމަށް އޭނާ ވިދާޅުވިއެވެ.
ތައްޔިބް އިތުރަށް ވިދާޅުވީ ރާއްޖެ ޕްރޮމޯޓް ކުރުމަށް މި އަހަރު ތެރޭގައި 412 ހަރަކާތް ކުރިއަށް ގެންދެވިއްޖެ ކަމަށާއި އެގޮތުން ގްލޯބަލް މާކެޓުގައި 22 ކަމަކާއި ކޯވިޑްގެ ކަންތަކުގެ ތެރޭގައި ގެންދެވުނު 314 ހަރަކާތް ހިމެނޭ ކަމުގައި އޭނާ ވިދާޅުވިއެވެ.
