މުސްލިމް މަންމަ ނިޔާވީ ކޮވިޑް ޖެހިގެން ނޫންކަން އެނގުނީ އަންދާލިފަހުން
ސްރީލަންކާ ގައި ކޯވިޑް-19 ޖެހޭ މީހުންގެ ތެރެއިން އެންމެ ބޮޑު ތަކުލީފަކާއި ހިތާމައެއް އުފުލަން ޖެހިފައިވަނީ މުސްލިމުންނަށެވެ. ކޯވިޑް ޖެހިގެން މަރުވާ މީހުން ނުހިނަވާ އަންދާލުމަށް އެޤައުމުގެ ސަރުކާރުން ނިންމުމާއި ގުޅިގެން އެތައް މުސްލިމުންނެއް ވަނީ އެކަމާއި ކަންބޮޑުވުން ފާޅުކޮށްފައެވެ.
މިނިންމުމާއިއެކު ދާދި ފަހުން އެޤައުމުގައި ވަނީ ވަރަށް ހިތާމަވެރި ހާދިސާއެއް ވެސް ހިނގާފައެވެ.
ކޮލޮމްބޯގައި އުމުރުން 44 އަހަރުގެ ފާތިމާ ރިނޯސާ ނިޔާވުމުން އަންދާލީ، އޭނާއަކީ ކޯވިޑަށް ފައްސިވީ މީހެއްކަމަށް ބުނެއެވެ.
ނަމަވެސް އޭނާގެ ހަށިގަނޑު އަންދާލިތާ ދެ ދުވަސްފަހުން، ދުނިޔޭގައި ހުރިއިރު އެންމެ ފަހުން އޭނާ ހެދި ޓެސްޓުގެ ނަތީޖާއިން ދެއްކީ، ފާތިމާ އަށް ކޯވިޑް ޖެހިފައިނުވާ ކަމަށެވެ.
ފާތިމާގެ ހަތަރު ފިރިހެން ދަރިންގެ ތެރެއިން އެއް ފިރިހެން ދަރި ކަމަށްވާ މުޙައްމަދު ސާޖިދު ބުނެފައިވަނީ މިމަހުގެ ފަސްވަނަ ދުވަހު އޭނާގެ މަންމަގެ ހަށިގަނޑު އަންދާލާފައިވަނީ އިސްލާމީ ހަމަތަކާއި ޚިލާފަށް ކަމަށެވެ.
ސާޖިދު ބުނީ އޭނާގެ މަންމަގެ ހަށިގަނޑު އަންދާލަން އެއްބަސްވާ ފޯމުގައި އޭނާގެ ބޭބެ ސޮއި ކުރީ، ލަންކާ ސަރުކާރުގެ ނުފޫޛުން ކަމަށެވެ.
"މަންމަ ނިޔާވެގެން އަންދާލިތާ ދެ ދުވަސް ފަހުން މީޑިއާ މެދުވެރިކޮށް އަހަރުމެންނަށް އެނގުނީ، މަންމަގެ ޓެސްޓުތަކުގައި އޮޅުމެއްވާ ކަމާއި، ފަހުން ހެދި ޓެސްޓުން މަންމަ ކޯވިޑް އަށް ޕޮޒިޓިވް ނޫންކަން ވެސް. އަހަރުމެންގެ މުޅި އާއިލާއަށް މިކަމުގެ ސަބަބުން މިވަނީ ކޮޅު ނެތްކޮޅަށކޮޅެއް ނެތް ހިތާމައާއި ކުރިމަތިވެފަ. ބައްޕަ ވެސް ބުނީ މަންމަ ނިޔާވެއްޖެކަން ކޮންމެވެސް ދުވަހަކުން ބައްޕައަށް ޤަބޫލު ކުރެވޭނެ ކަމަށް. އެކަމަކު ނިޔާވުމުން އަންދާލެވުނީތީ އެހިތާމަ އަބަދުވެސް އޮންނާނެ ކަމަށް" ސާޖިދުގެ ބައްޕަ ބުންޏެވެ.
ފާތިމާ އާއިލާއިން ދަނީ މިކަމާއި ވަރަށް ބޮޑަށް ހިތާމަ ކުރަމުނެވެ.
