ދުނިޔޭގެ ކަންކޮޅުތަކުގައި ހާލުގައި ޖެހިފައިވާ ފަރާތްތަކަށް ރޯދަ ވީއްލުމެއް ދޭން ބޭނުންތަ؟
ދުނިޔޭގެ އެކި ކަންކޮޅުތަކުގައި ހާލުގައި ޖެހިފައިވާ ފަރާތްތަކަށް ރޯދަ ވީއްލުން ދިނުމުގެ ފުރުސަތު އިންޓަނޭޝަނަލް އެއިޑް ކެމްޕޭން (އައިއޭސީ) އިން ހުޅުވާލައިފިއެވެ.
އިފްތާރު ޕެކޭޖް ހަދިޔާކުރުމާއި ބެހޭގޮތުން މަޢުލޫމާތު ދެއްވަމުން އައިއޭސީގެ އިންޓަނޭޝަނަލް ރިލޭޝަން ހެޑް މުހައްމަދު އަލީ ވިދާޅުވީ، ދުނިޔެއަށް ކުރިމަތިވެފައިވާ ބަލިމަޑުކަމުގެ ހާލަތާއި ގުޅިގެން ވަރަށް އުނދަގޫ ހާލަތެއްގައި ގިނަ ބަޔަކު ދިރިއުޅެމުންދާއިރު، މީގެކުރިން އެތައް އަހަރެއް ވަންދެން ހަމަނުޖެހުމާއި ފަޤީރު ހާލަތުގައި ދިރިއުޅެމުންދިޔަ ފަރާތްތައް މިއަދު އުޅެން ޖެހިފައިވަނީ މާ ހިތްދަތި ހާލަތެއްގައި ކަމަށެވެ.
މީގެއިތުރުން، އެހެން އަހަރުތަކޭ އެއްގޮތައް ރަމަޟާން މަހާއި ދިމާކޮށް ކުރިޔަށް ގެންދާ ލޯތްބާއެކު ކެމްޕޭނު މި އަހަރު އަމާޒުކޮށްފައިވަނީ ދުނިޔެއަށް ކުރިމަތިވެފައިވާ ބަލިމަޑުކަމުގެ ހާލަތާއި ގުޅިގެން ކަމަށާއި އިފްތާރު ޕެކޭޖް ހަދިޔާ ކުރުމުގެ ބަޔަކީ ވެސް ލޯތްބާއެކު 2020 ޕެންޑެމިކް ރިލީފް ކެމްޕޭނުގެ ތެރޭގައި ހިމެނޭ ބައެއްކަމަށް އައިއޭސީން މައުލޫމާތު ދީފައިވެއެވެ.
"ލޯތްބާއެކު" 2020 | ޕެންޑަމިކް ރިލީފް
ރޯދަވީއްލުމުގެ ޕެކޭޖެތަށް ބެހުމުގެ މަސައްކަތް ސީރިއާގައި ކުރިއަށް ދަނީPosted by International Aid Campaign on Monday, May 11, 2020
އައިއޭސީއިން މަޢުލޫމާތު ދީފައިވާ ގޮތުގައި ދިވެހި ރައްޔިތުންގެ ތެރެއިން ކޮންމެ ފަރާތަކަށްވެސް އައިއޭސީއިން އެހީވުމަށް ކަނޑައަޅާފައިވާ 6 ޤައުމުގެ ތެރެއިން ކޮންމެވެސް އެއް ޤައުމެއްގެއެންމެ މަދުވެގެން 50 ފަރާތެއްގެ އެއް ދުވަހުގެ ރޯދަ ވީއްލުމެއް ހަދިޔާ ކުރުމުގެ ފުރުސަތު އެބައޮތެވެ.
އައިއޭސީއިން ރޯދަ ވިއްލުމުގެ ޕެކޭޖްތައް ތައްޔާރު ކުރަނީ އެހީވުމަށް ކަނޑައަޅާފައިވާ ސަރަހައްދުތަކުގެ ތެރެއިން އެއް ސަރަހައްދަކަށް 100 މީހުންނަށް ވާވަރަށް އިފްތާރު ޕެކޭޖް ހަމަވުމުންނެވެ. މީގެއިތުރުން، ރޯދަ ވީއްލުން ހަދިޔާކުރުމުގެ ޑޮނޭޝަން ނަގަނީ މަދުވެގެން 50 ފަރާތެއްގެ ރޯދަ ވީއްލުން ހަދިޔާކުރަން ބޭނުންވާ ފަރާތްތަކުގެ ކިބައިންކަން އައިއޭސީއިން ހާމަކުރެއެވެ.
މުހައްމަދު އަލީ ވިދާޅުވީ އިފްތާރު ޕެކޭޖް ހަދިޔާކުރުމުން ފަގީރު ހާލުގައި ދިރިއުޅެމުންދާ ފަރާތްތަކަށް ވަރަށް ބޮޑު ހަދިޔާއަކަށް ވެގެން ދާނެކަމަށާއި ދުނިޔޭގެ ކޮންމެވެސް ބަޔަކު އެ ނިކަމެތިންނާއި މެދު ވިސްނަމުންދާކަން އެމީހުންނަށް އިޙްސާސްވާނެ ކަން މުހައްމަދު އަލީ ހާމަކުރެއްވިއެވެ. އައިއޭސީއިން އިފްތާރު ޕެކޭޖް ހަދިޔާ ކުރުމުގެ ޕްރޮގްރާމް ކުރިޔަށް ގެންދަނީ މި ރަމަޟާން މަހު ފަޤީރުންނަށް އެހީވުމުގައި ގިނަ ބަޔަކު ޝާމިލްކުރުމުގެ ބޭނުމުގައެވެ.
ދުނިޔޭގެ ހާލުގައި ޖެހިފައިވާ ޤައުމުތަކުގެ މީހުންނަށް އިފްތާރު ޕެކޭޖު ހަދިޔާ ކުރުމަށް އައިއޭސީއިން އިންޓަނޭޝަނަލް ރިލޭޝަން ހެޑް މުހައްމަދު އަލީ ވަނީ ދިވެހި ރައްޔިތުންނަށް ގޮވާލައްވާފައެވެ.
އިފްތާރު ޕެކޭޖް ހަދިޔާ ކުރުމަށް ބޭނުންވާ ފަރާތްތަކުން އައިއޭސީގެ ހޮޓްލައިން ނަންބަރު 9122121 އަށް ގުޅުއްވައިގެން، އިފްތާރު ޕެކްތަކުގެ އަގާއި އަދި ހަދިޔާ ކުރެވޭނެ ޤައުމު ތަކުގެ މަޢުލޫމާތު ލިބިވަޑައިގަންނަވާނެއެވެ.
މީގެއިތުރުން، މި ކެމްޕޭނަށް ހަދިޔާ ކުރުމަށް ބޭނުންވާ ފަރާތްތަކަށް އައިއޭސީގެ އެކައުންޓް ނަންބަރު 7770000026259 މެދުވެރިކޮށް މި ކެމްޕޭނަށް ޑޮނޭޓް ކުރުމުގެ ފުރުސަތު ވަނީ ހުޅުވާލާފައެވެ.
މިހާތަނަށް އިންޓަނޭޝަނަލް އެއިޑް ކެމްޕޭނުގެ ފަރާތުން ވަނީ ތުރުކީގެ ބޯޑަރު ސަރަހައްދުގައި ދިރިއުޅޭ ސީރިއާގެ ރެފިއުޖީންނަށް 500 އިފްތާރު ޕެކޭޖް ހަދިޔާކޮށްފައެވެ. މި 500 އިފްތާރު ޕެކޭޖަކީ ދިވެހިންތަކެއްގެ ހެޔޮއެދުމާއިއެކު ހަދިޔާކޮށްފައިވާ ޕެކޭޖްތަކެކެވެ.
އައިއޭސީއިން ކުރިޔަށްގެންދާ ލޯތްބާއިއެކު 2020 ޕެންޑެމިކް ރިލީފް ކެމްޕޭނަށް ގިނަ ބަޔެއްގެ ތަރުޙީބު ލިބިފައިވާއިރު، މި ކެމްޕޭނުގެ ތެރެއިން ޖުމުލަ 60 ޑޮލަރަށް 6 މީހުންގެ އާއިލާއަކަށް އެއް މަސް ދުވަހުގެ ކާބޯތަކެތީގެ އިތުރުން އެއް މަހުގެ ހައިޖީން ޕެކެއް ދެވޭނެ އިންތިޒާމް ހަމަޖައްސާފަވެއެވެ.
ކީރިތި ނަބިއްޔާ މުޙައްމަދު ރަސޫލުﷲ ޞައްލަﷲ ޢަލައިހި ވަސައްލަމް ޙަދީޘް ކުރައްވާފައިވާ ބަސްފުޅެއްގެ މާނައިގައިވެއެވެ. '' މީހަކަށް ޖެހިފައިވާ ތި އުނދަގުލެއް ފިލުވައިދިން މީހަކަށް ޤިޔާމަތް ދުވަހުގައި ﷲ ތަޢާލާ ދަތިކަމެއް ފިލުއްވާ ދެއްވާ ހުއްޓެވެ. އަދި ބޭނުން ޖެހިފައިވާ މީހަކަށް އެހީތެރިވެދިން މީހަކަށް ދުނިޔެއާއި އާޚިރަތުގައި ﷲ ތަޢާލާ އެހީތެރިވެ ދެއްވުމުގައި ވޮޑިގެންވެއެވެ.''
އެކުވެރީންނެވެ. ﷲ ތަޢާލާގެ މަދަދަށްވުރެ ބޮޑު ނިޢުމަތެއް މި ދުނިޔޭގައި އޮންނާނެ ހެއްޔެވެ؟ ސީރިޔާއާއި ފަލަސްތީނުގައި ނިކަމެތިވެފައިވާ އެތިބަ މައުސޫމް ކުދިންގެ މޫނު މައްޗަށް އެންމެ ފަހަރަކު ނަމަވެސް ހިނިތުންވުމެއް ގެނެސްދިނުމުގެ ފުރުސަތު ތިބާއަށް ވެސް އެބައޮތެވެ. އެފަދަ ކުއްޖެއްގެ ހިނިތުންވުމަކުން ތިބާގެ ހިތް މުއްސަނދި ވެގެން ދާނެއެވެ. މުދަލުގައި ބަރަކާތް ލައްވާނެއެވެ.
