ފައްސިވެގެން ފަރުވާދެމުންދާ އެކެއްގެ ހާލު ސީރިއަސް: ޑރ. މުރާދު
ކޮވިޑަށް ފައްސިވެގެން ފަރުވާދެމުންދާ އެކެއްގެ ހާލު ސީރިއަސް ކަމަށް ޑރ. މޫސާ މުރާދު ވިދާޅުވެއްޖެއެވެ.
މިރޭ ބޭއްވި ނޫސްވެރިންގެ ބައްދަލުވުމެއްގައި ޑރ. މުރާދު ވިދާޅުވީ ކޮވިޑަށް ސީރިއަސް ބަލި މީހުންގެ ތެރެއިން އެންމެ ހާލު ބޮޑު މީހުން ތިބީ ދަރުމަވަންތަ ހޮސްޕިޓަލުގެ 11 ވަނަ ފަންގިފިލާގަ އާއި ޓްރީޓޮޕް ހޮސްޕިޓަލުގައި ކަމަށެވެ.
އެގޮތުން ދަރުމަވަންތަ ހޮސްޕިޓަލުގެ 11 ވަނަ ފަންގިފިލާގައި މިވަގުތު ތިބީ ތިން ބަލި މީހުން ކަމަށާއި އޭގެތެރެއިން ދެ މީހަކު ވެންޓިލޭޓަރުގައި ތިބިއިރު އަނެއް މީހާގެ ހާލު ރަނގަޅު ކަމަށްވެސް މުރާދު ވިދާޅުވިއެވެ.
އަދި ޓްރީޓޮޕްގައި 10 މީހަކު އެޑްމިޓްކޮށްފައިވާއިރު، ދެ މީހަކު ތިބީ ވެންޓިލޭޓަރުގައި ކަމަށް މުރާދު ވިދާޅުވިއެވެ. އަދި ވެންޓިލޭޓަރަށް ނުލާ އޮތް ބަލި މީހެއްގެ ހާލު ތަންކޮޅެއް ސީރިއަސް ކަމަށާއި އޭނާގެ ކަންކަން ވަރަށް ކައިރިން މޮނީޓާ ކުރަމުންދާ ކަމަށްވެސް މުރާދު ވިދާޅުވިއެވެ.
"އެހެން ބަލި މީހުންގެ ހާލު ސްޓޭބަލް، އިތުރު މައްސަލައެއް ފާހަގަކުރެވިފައެއް ނުވޭ" މުރާދު ވިދާޅުވިއެވެ.
ރާއްޖެއިން މިހާތަނަށް ކޮވިޑަށް 955 މީހަކު ފައްސި ވެފައިވާއިރު، އޭގެތެރެއިން 40 މީހަކު ބަލިން ރަނގަޅުވެ، ތިން މީހަކު ވަނީ މަރުވެފައެވެ.
Ads by STO
