ކޮވިޑް ޖެހިގެން ރާއްޖެއިން 4 ވަނަ މީހަކު ނިޔާ ވެއްޖެ، މަރްހޫމްއަށް ސުވަރުގޭގެ މަތިވެރި ނިއުމަތް ދެއްވާށި!
ކޮވިޑް ޖެހިގެން ރާއްޖެއިން 4 ވަނަ މީހަކު ނިޔާ ވެއްޖެއެވެ.
ހެލްތު ޕްރޮޓެކްޝަން އެޖެންސީ(އެޗްޕީއޭ) އިން ދާދި ދެންމެއަކު ބުނީ މި މީހާ ނިޔާވެފައިވަނީ މިރޭ 11:15 ގައި ދަރުމަވަންތަ ހޮސްޕިޓަލުގެ ޑީއެޗް11 ގައި ފަރުވާ ދެމުން ދަނިކޮށް ކަމަށެވެ.
އެޗްޕީއޭއިން ބުނީ ނިޔާވެފައި ވަނީ އުމުރުން 88 އަހަރު ދިވެހި ފިރިހެނެއް ކަމަށެވެ.
ކޮވިޑް ޖެހިގެން މީގެ ކުރިން މަރުވީ ދެ ދިވެހިންނާއި ބިދޭސީއެކެވެ. ރާއްޖެއިން ކޮވިޑް ޖެހިގެން ފުރަތަމަ މަރުވީ 83 އަހަރުގެ ދިވެހި އަންހެނެކެވެ. އޭގެ ފަހުން މަރުވެފަ ވަނީ ސިފައިންގޭގެ ގުދަނެއްގައި މަސައްކަތް ކުރަމުން އައި ބަންގްލަދޭޝް މީހެކެވެ. މަރުވި ތިން ވަނަ މީހާއަކީ ދަރުމަވަންތަ ހޮސްޕިޓަލްގައި ފަރުވާ ދެމުންދިޔަ 80 އަހަރުގެ ދިވެހި ފިރިހެނެކެވެ.
ރާއްޖޭގައި މިބަލި ޖެހިފައިވާ މީހުންގެ ޖުމުލަ އަަދަދު ވަނީ 955 އަށް އަރާފައެވެ. އަދި މި ވަގުތު އޭގެތެރެއިން ފަރުވާދެމުން ގެންދަނީ 910 މީހަކަށެވެ. އަދި ޖުމުލަ 40 މީހަކު ވަނީ މި ބަލިން ރަނގަޅު ވެފައެވެ.
Ads by STO
