ކޮވިޑް ޖެހިގެން މިރޭ އަވަހާރަވީ އެމްއެޗްއޭގެ ވެރިޔާ!
މިރޭ ކޮވިޑް ޖެހިގެން އަވަހާރަވީ ރާއްޖޭގެ މަޝްހޫރު ވިޔަފާރިވެރިޔާ އަދި އެމްއެޗްއޭގެ ވެރިޔާ ހުސައިން އަބްދުﷲ ކަން އެނގިއްޖެއެވެ.
އެޗްޕީއޭ އިން ބުނީ ނިޔާވެފައިވަނީ ދަރުމަވަންތަ ހޮސްޕިޓަލުގައި ފަރުވާދެމުންދިޔަ އުމުރުން 88 އަހަރުގެ ދިވެހި ފިރިހެނެއް ކަމަށެވެ. އެމީހާ ނިޔާވީ މިރޭ 11:15 ހާއިރު އެވެ.
ހުސައިން އަބްދުﷲ އަވަހާރަވިއިރު ފަރުވާ ދެމުން ގެންދިޔައީ ވެންޓިލޭޓަރުގައެވެ. އޭނާ އަށް ވެންޓިލޭޓަރުގައި ފަރުވާ ދޭން ފެށީ މިމަހުގެ 3 ވަނަ ދުވަހު އެވެ. އޭގެ ކުރިން އޭޕްރީލް 30 ވަނަ ދުވަހުން ފެށިގެން އޭނާ އަށް ފަރުވާ ދެމުން ގެންދިޔައީ އައިސީޔޫގައެވެ.
ހުސައިން އަބްދުﷲ އަކީ ކޮވިޑް-19 ޖެހިގެން ރާއްޖެ އިން ފުރަތަމަ ނިޔާވި އަންހެން މީހާގެ ފިރިމީހާއެވެ.
މިއީ ކޮވިޑް އާއި ގުޅިގެން ރާއްޖެއިން ނިޔާވި ހަތަރުވަނަ ފަރާތެވެ. މީގެކުރިން ނިޔާވެފައިވަނީ ދެ ދިވެއްސަކާއި ބިދޭސީއެކެވެ. ރާއްޖެއިން ކޮވިޑް ޖެހިގެން ފުރަތަމަ މަރުވީ 83 އަހަރުގެ ދިވެހި އަންހެނެކެވެ. އޭގެ ފަހުން މަރުވެފަ ވަނީ ސިފައިންގޭގެ ގުދަނެއްގައި މަސައްކަތް ކުރަމުން އައި ބަންގްލަދޭޝް މީހެކެވެ. މަރުވި ތިން ވަނަ މީހާއަކީ ދަރުމަވަންތަ ހޮސްޕިޓަލްގައި ފަރުވާ ދެމުންދިޔަ 80 އަހަރުގެ ދިވެހި ފިރިހެނެކެވެ.
ރާއްޖޭގައި މިބަލި ޖެހިފައިވާ މީހުންގެ ޖުމުލަ އަަދަދު ވަނީ 955 އަށް އަރާފައެވެ. އަދި މި ވަގުތު އޭގެތެރެއިން ފަރުވާދެމުން ގެންދަނީ 910 މީހަކަށެވެ. އަދި ޖުމުލަ 40 މީހަކު ވަނީ މި ބަލިން ރަނގަޅު ވެފައެވެ.
