ކޮންމެ ދުވަހަކު ވެސް ވަކި ވަގުތަކަށް ސިނަމާލެ ބްރިޖު ބަންދު ކުރަނީ

ކުރިއަށް އޮތް ދުވަސްތަކުގައި ކޮވިޑް-19ގެ ސާޖެއް އަންނާނެ ކަމަށް ލަފާކޮށްފައިވާތީ ފިޔަވަޅުތައް އިތުރަސް ހަރުކަށި ކުރުމުގެ ގޮތުން ކޮންމެ ދުވަހެއްގެ ވެސް ވަކި ވަގުތެއްގައި ސިނަމާލެ ބްރިޖު ބަންދު ކުރަން ނިންމާފައިވާ ކަމަށް ފުލުހުން ބުނެފިއެވެ.

Ads by MWSC

އެގޮތުން މިރޭ 1:00 އިން ފެށިގެން ކުރިއަށް އޮތް ދެ ހަފްތާއަށް ދަންވަރު 1:00 އިން ހެނދުނު 9:00 އަށް އާއްމުންނަށް ބްރިޖް ހުރަސް ނުކުރެވޭނެ ކަމަށް ފުލުހުން ވިދާޅުވިއެވެ.

އަދި ބްރިޖް ހުރަސް ކުރެވޭނީ، ކޮންމެހެން ކުރަން ޖެހޭ އާއްމު ޒަރޫރީ ދަތުރުތަކަށާއި، ސެކިއުރިޓީ ސާވިސްއަށްއެކަނި ކަމަށް ފުލުހުން ވިދާޅުވިއެވެ.

ފުލުހުން މިގޮތަށް ވިދާޅުވިއިރު، މިހާރުވެސް ބްރިޖް ސަރަހައްދުގައި ބްރިޖަށް އަރާ މީހުންނާއި، ފައިބާ މީހުންގެ އަތުގައި އޮތީ ރަނގަޅު ފާހެއްތޯ ބެލުމުގެ ކަންކަން ފުލުހުން ދަނީ ކުރަމުންނެވެ.

ކޮވިޑް-19އާ ގުޅިގެން މާލެ ސަރަހައްދުގައި އިއުލާންކޮށްފައިވާ ލޮކްޑައުންގެ މުއްދަތު އިތުރު 14 ދުވަހަށް ވަނީ އިތުރު ކޮށްފައެވެ. އެގޮތުން ލޮކްޑައުންގެ މުއްދަތު ދެން ހަމަވާނީ މި މަހުގެ 28 ވަނަ ދުވަހުގެ ނިޔަލަށެވެ.

މާލެއިން ފައްސިވާ މީހުންގެ އަދަދު އިތުރުވަމުންދާއިރު، ކުރިއަށް މިއޮތް ދެތިން ހަފުތާގެ ތެރޭގައި، މާލޭގައި ކޮވިޑް-19 ގެ ބަލީގެ ޙާލަތު، މިހާރަށް ވުރެ މައްޗަށް ދިޔުން އެކަށީގެންވާ ކަމެއް ކަމަށް ސިއްހީ ތަޖުރިބާކާރުން ބުނެއެވެ.