ލޮކްޑައުން އިތުރަށް ހަރުކަށި ކޮށްފި؛ ދެން ބާޒާރަށް ދެވޭނީ ހަފުތާއަކު އެއް ފަހަރު
އަދާހަމަ: މިގޮތަކަށް އަމަލު ކުރަން ފަށާނީ 17 މެއި 2020 އިން ފެށިގެން ކަމަށް ފުލުހުން ދާދި ދެންމެއަކު ވިދާޅުވެއްޖެ.
ކޮރޯނާވައިރަސް ފެތުރުން ކޮންޓްރޯލް ކުރުމަށްޓަކައި އަޅާފައިވާ ފިޔަވަޅުތައް އިތުރަށް ވަރުގަދަ ކުރުމަށްޓަކައި ކޮންމެ ގެ އަކުން ވެސް މިއަދުން ފެށިގެން ބާޒާރަށް ނުކުމެވޭނީ ހަފުތާއަކު އެއް ދުވަހު ކަމަށް ފުލުހުން ކަނޑައަޅައިފި އެވެ.
މިއީ ކޮރޯނާވައިރަސް އިން ފެތުރޭ ކޮވިޑް-19 ގެ ސާޖެއް ނުވަތަ ކުއްލި އިތުރުވުމެއް މި ދެ ހަފުތާގައި އިތުރުވެދާނެ ކަމަށް ސިއްހީ މާހިރުން ގަބޫލު ކުރައްވާތީ ފުލުހުން އެޅި ފިޔަވަޅެއް ކަމަށް ފުލުހުންގެ އިދާރާ އިން ބުނެ އެވެ.
މާލެތެރެއަށް ކޮރޯނާވައިރަސް ފެތުރެން ފެށުމުން މިދިޔަ މަހުގެ 15 ގައި މާލެ އާއި ވިލިމާލެ އަދި ހުޅުމާލެ ލޮކްޑައުންކޮށް، ކޮންމެ ގެއަކުން ކޮންމެ ހަފުތާ އަކު ތިން ދުވަހުން އެއް ދުވަހު ބާޒާރަށާއި އެހެނިހެން ބޭނުމަށް އެކަކަށް ނުކުމެވޭ ގޮތަށް ފުލުހުން ހަމަޖައްސައި ދިނެވެ. އެކަމަށް އެދި ޚާއްސަ ފޯމު ފުރަން ޖެހެނީ ޕޮލިސް ޕޯޓަލް މެދުވެރިކޮށެވެ. އެ ފޯމު ފުރުމުން ފުލުހުންގެ ހުއްދައެއް ކޮންމެ މީހެއްގެ ފޯނަށް ވެސް ލިބޭނެ އެވެ. އެ މީހަކަށް ބޭރުގައި ހަރަކާތްތެރިވެވޭނީ ވަކި ވަގުތަކަށް، ވަކި ސަރަހައްދުތަކެއްގަ އެވެ. އެ ގޮތަށް އަމަލު ކުރޭތޯ ފުލުހުން އައީ ބަލަމުންނެވެ. އެގޮތުން ބާޒާރަށް ގޮސް ފިހާރަތަކުގެ ކިއޫގައި ތިބޭ މީހުންނާ ސުވާލުކޮށް، ޚާއްސަ ހުއްދަ އޮތްތޯ ބަލަ އެވެ. އެ ހުއްދަ ނެތް މީހުން ގެ އަށް ފޮނުވަމުން ދިޔަ އެވެ.
ފުލުހުން މިއަދު ބުނީ، ކުރީގެ އުސޫލު ބަދަލުކޮށް، ދެން ބާޒާރަށް ދާން ނުކުމެވޭނީ ހަފުތާއަކު އެއްފަހަރު ކަމަށެވެ. ކޮންމެ ގެ އަކަށް ވެސް ކަނޑައަޅާފައިވާ އާ ގަޑިތައް، ފޯނަށް ފޮނުވާ އާ މެސެޖަކުން އެނގޭނެ ކަމަށް ފުލުހުން ބުންޏެވެ.
"އަލުން ރެޖިސްޓަ ކުރައްވަން ނުޖެހޭނެ،" ފުލުހުން ބުންޏެވެ.
ފުލުހުންގެ މި ފިޔަވަޅާ އެކު، ބެލެވޭ ގޮތުގައި މި ދެ ހަފުތާއެއްހާ ދުވަހުގެ ތެރޭގައި ބޭރުތެރޭގައި އާންމުން އުޅުން ވަރަށް ބޮޑަށް ކޮންޓްރޯލް ކުރާނެ އެވެ.
