ހިންމަފުށި ރިހެބުގައި ތިބި 3 މީހަކު ފައްސި ވެއްޖެ
ކ. ހިންމަފުށީގައި ހުންނަ ޑްރަގް ރިހިބިލިޓޭޝަން ސެންޓަރުގައި ތިބި 3 މީހަކު ކޮވިޑަށް ފައްސި ވެއްޖެއެވެ.
ބައެއް މީޑިއާތަކަށް މައުލޫމާތު ދެއްވަމުން އެ ރަށު ކައުންސިލްގެ ނައިބު ރައީސް ހަސަން ފާއިޒް މިއަދު ވިދާޅުވީ، ޑްރަގް ރިހިބިލިޓޭޝަން ސެންޓަރުން ނެގި ސާމްޕަލްތަކުގެ ތެރެއިން ތިން ސާމްޕަލް ފައްސިވެފައިވާކަން އެޗްޕީއޭއިން މިއަދު އަންގާފައިވާ ކަމަށެވެ.
ހިންމަފުށީ ކައުންސިލުން ބުނީ ޑިރެކްޓާ ޖެނެރަލް އޮފް ޕަބްލިކް ހެލްތަށް ލިބިގެންވާ ބާރުގެ ދަށުން ހިންމަފުށި ވަނީ ސިއްހީ ގޮތުން އިތުރަށް ބަލަންޖެހޭ ކަންކަން ބެލުމަށް ވަކި ގޮތެއް އަންގަންދެން މޮނީޓަރިންގެ ހާލަތަށް ގެނެވިފައި ކަމަށެވެ.
އެގޮތުން މިވަގުތު ރަށުގައި ތިބި އެއްވެސް މީހަކު އެޗްޕީއޭ އިން ވަކިގޮތެއް އަންގަންދެން ރަށުން ފޭބުމާއި، އެޗްޕީއޭގެ ހުއްދަ ނެތި އެ ރަށަށް އެރުން ވަނީ ވަގުތީ ގޮތުން މަނާކޮށްފައެވެ.
މިއަދު އެކަނިވެސް ރާއްޖެއިން 38 މީހަކު ފައްސިވެފައިވާއިރު، ރާއްޖެ އިން ބަލި ޖެހުނު މީހުންގެ އަދަދު މިހާރު ވަނީ 1020 އަށް އަރާފައެވެ.
Ads by STO
