ފިތުރު ޒަކާތުގެ ގޮތުގައި މިހާތަނަށް 2 މިލިއަން ރުފިޔާ ލިބިއްޖެ
ފިތުރު ޒަކާތުގެ ގޮތުގައި މިހާތަނަށް 2 މިލިއަނަށް ވުރެ ގިނަ ރުފިޔާ ލިބިފައިވާ ކަމަށް އިސްލާމިކް މިނިސްޓަރު ޑރ. އަހްމަދު ޒާހިރު ވިދާޅުވެއްޖެ އެވެ.
ދައުލަތުގެ މީޑިއާ ޕީއެސްއެމްއަށް ދެއްވި އިންޓަވިއުގައި މިނިސްޓަރު ވިދާޅުވީ، މި އަހަރުގެ މިހާތަނަށް 2،480200 (ދެ މިލިޔަން ހަތަރުލައްކަ އަށްޑިހަ ދެހާސް) ރުފިޔާ ލިބިފައިވާ ކަމަށެވެ.
މިނިސްޓަރު ވިދާޅުވީ މާލެ ސަރަހައްދުން މިހާތަނަށް 53،597 މީހަކު ވަނީ އޮންލައިން ކޮށް ޒަކާތް ދައްކާފައިވާ ކަމަށެވެ. އަދި އެހެން އަހަރުތަކާއި ބަލާފައި ޒަކާތް ދައްކާފައިވާ މީހުންގެ އަދަދު މަދުވި ކަމުގައިވިޔަސް މި ވަގުތުގެ ހާލަތަށް ބަލާނަމަ މިއީ ރަނގަޅު އަދަދެއް ކަމަށް މިނިސްޓަރު ފާހަގަކުރައްވަ އެވެ.
އިސްލާމިކް މިނިސްޓްރީން މިއަހަރުގެ ފިތުރު ޒަކާތް ބެހުމަށް ނިންމާފައިވަނީ މިދިޔަ އަހަރު އެކުލަވާލާފައިވާ ފަގީރުންގެ ލިސްޓަށެވެ. އެގޮތަށް ބެހުމަށް ނިިންމާފައިވަނީ ކޮވިޑް-19 ގެ މިހާލަތުގެ ސަބަބުން ދަފްތަރު އެކުލުވާލުމުގައި ހުރި ދަތިތަކުގެ ސަބަބުން އެކަން ލަސްކޮށްފައި ވާތީ ކަމަށް އެ މިނިސްޓްރީން ބުނެ އެވެ.
އިސްލާމިކް މިނިސްޓްރީން ބުނެފައިވާ ގޮތުގައި މިވަގުތު ރާއްޖޭގައި ފަގީރުންގެ ގޮތުގައި ތިބީ 8764 މީހުން ނެވެ. އޭގެ ތެރޭގައި މާލޭގެ ދަފްތަރުގައި 1717 މީހަކާއި އަތޮޅުތަކުން 7047 މީހުން ފަގީރުންގެ ގޮތުގައި އެބަތިއްބެވެ.
