އިންޑިއާގެ މަނަވަރުގައި އިތުރު 588 މީހަކު އަނބުރާ ގައުމަށް!
ރާއްޖޭގައި ތިބި އިންޑިއާގެ ރައްޔިތުން އަނބުރާ ގައުމަށް ގެންދިއުމަށް ފަށާފައިވާ ބޮޑު އޮޕަރޭޝަނުގެ ތެރެއިން ރާއްޖެ އައި އިންޑިއާގެ މަނަވަރެއްގައި އެގައުމުގެ 588 މީހަކު މިއަދު ފުރައިފިއެވެ.
މިމީހުން ފުރުވާލާފައި ވަނީ މިއަދު ހަވީރު ފުރި އިންޑިއާގެ މަނަވަރު "އައިއެންއެސް ޖަލަޝްވާ" އިންނެވެ. މި މަނަވަރު އެނބުރި ދާނީ ކޮޗީ އަށެވެ.
މި ފަރާތްތަކުން ކޮޗީގައި 14 ދުވަހުގެ ކަރަންޓީނު މުއްދަތެއް ފުރިހަމަ ކުރަންޖެހޭއިރު، އެއަށްފަހު އެ ފަރާތްތަކުން ބޭނުން ތަނަކަށް ދިއުމުގެ ފުރުސަތު ދިނުމަށް ވަނީ ހަމަޖެހިފައެވެ.
ރާއްޖޭގެ އިތުރުން ޔޫއޭއީގައި ތާށިވެފައި ތިބި އިންޑިއާގެ މީހުން އަނބުރާ ގެންނަން ވެސް ވަނީ މަނަވަރެއް ފޮނުވާފައެވެ. މީގެއިތުރުން މަތިންދާބޯޓުގައި ވެސް މީހުން އަނބުރާ ގެނައުމުގެ މަސައްކަތް އެގައުމުގެ ސަރުކާރުން އަންނަނީ ކުރަމުންނެވެ.
ރާއްޖެއިން މިހާތަނަށް ފައްސިވި މީހުންގެ ތެރޭގައި އިންޑިއާގެ 99 މީހަކު ހިމެނެއެވެ.
