މާލޭގެ މިސްކިތެއްގެ އިމާމަކު ކޮވިޑަށް ފައްސި ވެއްޖެ
މާލޭގެ މިސްކިތެއްގެ އިމާމަކު ކޮވިޑަށް ފައްސި ވެއްޖެއެވެ.
މައުލޫމާތު ލިބިފައިވާ ގޮތުގައި ހެންވޭރުގައި ހުންނަ އެ މިސްކިތުގެ އިމާމުކަން ކުރަމުން އަންނަ އެމީހާ ކޮވިޑަށް ފައްސިވިކަން އެނގުނީ މަގުމަތިން ނެގި ރެންޑަމް ސާމްޕަލް އަކުންނެވެ. އެކަން އެމީހާ އަށް އަންގާފައިވަނީ މިއަދުގެ މެންދުރުގެ ވަގުތެއްގައެވެ.
އޭނާ ފައްސިވިކަން ހެލްތް ޕްރޮޓެކްސަން އެޖެންސީ (އެޗްޕީއޭ) އިން އެންގި އިރު ހުރީ މިއަދު އަސަރު ނަމާދު ބަންގި ގޮވުމަށް މިސްކިތަށް ގޮހެވެ. އަދި އެޗްޕީއޭ އިން ބަލާ އަންނަންދެން އެމީހާ އަދިވެސް ހުރީ މިސްކިތުގައި ކަމަށްވެސް މައުލޫމާތު ލިބެއެވެ.
މިރޭ 8 ޖަހާކަންހާއިރު ބަލާ އަންނާނެ ކަމަށް އެޗްޕީއޭ އިން ބުނި ނަމަވެސް އަދިވެސް އައިސްފައިނުވާ ކަން ވަނީ އެނގިފަ އެވެ.
ކޮވިޑް އާއި ގުޅިގެން މިސްކިތުގެ ޖަމާއަތުގައި ނަމާދުކުރުން ވަގުތީ ގޮތުން މެދުކަނޑާލާފައިވީ ނަމަވެސް، ބަންގި ދިނުމަށް އިމާމުން މިސްކިތަށް ދެއެވެ.
މީގެކުރިން ވެސް ރެންޑަމްކޮށް ނެގި ސާމްޕަލްތަކެއް ފައްސި ވެފައިވާއިރު، މިއަދު އެކަނިވެސް ރާއްޖެއިން ވަނީ 24 ފައްސި ކޭސް ފެނިފައެވެ.
