ކުދި ވިޔަފާރިތަކަށް ދޭ ލޯނުގެ އަދަދު 30،000 ރުފިޔާއަށް އިތުރުކޮށްފި
އެސްއެމްއީ ފައިނޭންސް ޑިވެލޮޕްމަންޓް ކޯޕަރޭޝަން (އެސްޑީއެފްސީ) އިން ކުދި ވިޔަފާރިތަކަށް ދޭ ލޯނުގެ އަދަދު 30،000 ރުފިޔާއަށް އިތުރުކޮށްފި އެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ފިނޭންސް މިނިސްޓަރު އިބްރާހީމް އަމީރު ވިދާޅުވީ، ކޮވިޑާ ގުޅިގެން އެސްޑީއެފްސީން ތައާރަފްކުރި ކުދި ވިޔަފާރިތަކާއި މެދުފަންތީގެ ވިޔަފާތިތަކަށް ޚާއްސަ ލޯނުގެ ގޮތުގައި ދޫކުރުމަށް ނިންމީ 18،000 ރުފިޔާކަމަށެވެ.
ނަމަވެސް އެފަދަ ވިޔަފާރިތަކަށް ކުރިޔަށްވުރެ ފަހި ފުރުސަތުތަކެއް ފަހިކޮށްދިނުމުގެ ގޮތުން 18000 ރުފިޔާއިން 30000 ރުފިޔާއަށް ލޯން އިތުރުކުރަން ނިންމާފައިވާ ކަމަށް މިނިސްޓަރު އަމީރު ވިދާޅުވިއެވެ.
ސަރުކާރުގެ އިގްތިސާދީ ރިކަވަރީ ޕެކޭޖުގެދަށުން ތަޢާރަފްކުރި މިލޯނަށް އެދި ހުށަހެޅުމުގެ ފުރުސަތު ހުޅުވާލާފައިވާއިރު، ފިނޭންސް މިނިސްޓްރީއާއި އެސްޑީއެފްސީ ގުޅިގެން ހުޅުވާލި މި ލޯން މެދުވެރިކޮށް ވިޔަފާރިތަކަށް ދިމާވާ މާލީ ދަތިތަކަށް ލުޔެއް ހޯދައިދީ ވިޔަފާރިތައް ދެމެހެއްޓުމަށް އެހީ ފޯރުކޮށްދެވޭނެކަމަށް ސަރުކާރުންވަނީ ބުނެފައެވެ.
މިލޯނު ދޫކުރުމަށް ހަމަޖެހިފައިވަނީ ހަ ޕަސެންޓު އިންޓްރެސްޓް ރޭޓުގައި ގިނަވެގެން ތިން އަހަރުދުވަހުގެ މުއްދަތުން އަދާކުރާގޮތަށެވެ. މިލޯނުގެ ޝަރުޠުތަކުގެ ތެރޭގައި ވިޔަފަރީގެ ވޭތުވެދިޔަ އަހަރުގެ އާމްދަނީ ދިހަ މިލިއަން ރުފިޔާއަށްވުރެ ދަށްވުމާއި މިހާލަތާ ގުޅިގެން އަދި ލޯނު އެހީދޭ މުއްދަތުގެ ތެރޭގައިވެސް އެ ވިޔަފާރީގައި ޝާމިލުވާ އެއްވެސް ދިވެހި މުވައްޒަފަކު ވަޒީފާއިން ވަކިކޮށްފައި ނުވުން ހިމެނެއެވެ.
