މުވައްޒަފުން ވަކިކުރި ކުންފުނިތަކަށް ވެސް ޝަރުތުތަކާއެކު ލޯނު ދޫކުރަން ނިންމައިފި
ކޮވިޑް-19އާ ގުޅިގެން މުވައްޒަފުން ވަޒީފާ އިން ވަކިކުރި ކުންފުނިތަކަށް ޝަރުތުތަކާއެކު ސަރުކާރުގެ އެހީގެ ޕެކޭޖުގެ ތެރެއިން ލޯނު ދޫކުރަން ސަރުކާރުން ނިންމައިފިއެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި ފިނޭންސް މިނިސްޓަރު އިބްރާހިމް އަމީރު ވިދާޅުވީ މުވައްޒަފުން ވަޒީފާ އިން ވަކިކުރި ކުންފުނިތަކާއި، ނޯޕޭ އަށް ފޮނުވި ފަރާތްތަކާއި އަދި މުވައްޒަފުންގެ މުސާރައިން ބައެއް އުނިކުރި ފަރާތްތަކަށް ވެސް ޝަރުތުތަކާއެކު ލޯނު ދޫކުރަން މިހާރު ނިންމާފައިވާ ކަމަށެވެ.
އެގޮތުން އެ ޝަރުތަކީ މިހާރު ނިންމާފައިވާ ނިންމުން އަނބުރާ ގެނެސް، މުވައްޒަފުންނަށް މަދުވެގެން 5،000 ރުފިޔާ ދޭން އެއްބަސްވުން ކަމަށް އަމީރު ވިދާޅުވިއެވެ.
މީގެ ސަބަބުން މުވައްޒަފުންނާއި ވިޔަފާރިތަކަށް ވެސް އިތުރު ފައިދާތަކެއް ވާނެ ކަމަށްވެސް މިނިސްޓަރު ވަނީ ވިދާޅުވެފައެވެ. އަދި މިކަމާ ގުޅޭ ސާކިއުލާއެއް މިއަދު ނެރޭނެ ކަމަށްވެސް އަމީރު ވިދާޅުވިއެވެ.
ކޮވިޑް-19 އާއި ގުޅިގެން ގިނަ އަދަދެއްގެ މުވައްޒަފުން ވަޒީފާ އިން ވަކިކޮށްފައިވާއިރު، ސަރުކާރުން ވަނީ އެފަދަ މުވައްޒަފުންނަށް ތިން މަސް ދުވަހުގެ މުއްދަތަކަށް 5،000 ރުފިޔާގެ އެލަވެންސެއް ދިނުމަށް މިހާރު ނިންމާފައެވެ.
