ކޮވިޑާ ގުޅިގެން ދައުލަތުން ކުރާ ހަރަދުތައް އޮޑިޓްކުރަން ހުށަހަޅައިފި
ކޮވިޑް-19އާ ގުޅިގެން ދައުލަތުން ކުރަމުންދާ ހަރަދާއި، ދަރަންޏާއި މާލީ އެހީގެ ގޮތުގައި ލިބޭ ފައިސާ ހަރަދުކުރާ ގޮތުގެ ފައިނޭންޝަލް އޮޑިޓެއް ހެދުމަށް ރައްޔިތުންގެ މަޖިލީހުގެ ނާއިބު ރައީސް އީވާ ޢަބްދުﷲ ހުށަހަޅުއްވައިފިއެވެ.
މި ދަނޑިވަޅުގައި ދައުލަތުން ކުރަމުންދާ ޚަރަދުތަކާއި، އެހީގެ ގޮތުގައި ލިބެމުންދާ ޚަރަދުތައް ކުރަމުން ގެންދަނީ ދައުލަތުގެ މާލިއްޔަތު ޤާނޫނާއި އެއްގޮތަށްތޯ ބެލުމަށް އެމްޑީޕީގެ ޕާލިމަންޓްރީ ގްރޫޕްގެ ލީޑަރު ޢަލީ ޢާޒިމް ހުށައެޅުއްވި ހުށައެޅުން މަޖިލީހުގެ ކޮމިޓީތަކުން އަންނަނީ ދިރާސާކުރަމުންނެވެ. އަދި އެ ކޮމިޓީއެއްގެ ދާއިރާއިން ކަމާގުޅުންހުރި އިދާރާތަކުންނާއި މުއައްސަސާތަކުން މަޢުލޫމާތުއެއްކޮށް ސަރުކާރަށް ހުށައަޅަންޖެހޭ ކަންކަން ރިޕޯޓްގައި ހިމަނާ މަޖިލީހުން ވަނީ ބައެއް ރިޕޯޓްތައް ފާސްކުރައްވާފައެވެ.
މި ހާލަތުގައި ސަރުކާރުން ތައާރަފުކުރާ ޕްރޮގްރާމްތަކާއި ޕެކޭޖްތަކަށާއި ކޮވިޑް-19 އިގެ ސަބަބުން ދައުލަތް ހިންގަން ކުރަން ޖެހޭ ހަރަދުތައް ކުރަމުންދާ ގޮތާއި އެހީގެ ގޮތުގައި ލިބޭ ފައިސާ ހަރަދު ކުރަމުން ދަނީ މާލިއްޔަތު ގާނޫނާ އެއްގޮތަށްތޯ ބަލަން ވެސް ހުށަހަޅާފައިވެ އެވެ. ގާނޫނާ ހިލާފު ވާނަމަ ހަރަދުތަކުގެ ރިޕޯޓެއް ތައްޔާރު ކުރަން ވެސް ހުށަހަޅާފައި ވެއެވެ.
މާލިއްޔަތު ކޮމިޓީގެ ރިޕޯޓުގެ ހުށަހެޅުންތަކަށް އީވާ ވަނީ އިސްލާހެއް ހުށަހަޅުއްވައިފަ އެވެ. އީވާ ހުށައެޅުއްވި އިޞްލާހުގައި ވަނީ ކޮވިޑާ ގުޅިގެން ދައުލަތުން ކުރާ ޚަރަދުތަކާއި، އެހީގެ ގޮތުގައި ލިބޭ ފައިސާއާއި ދައުލަތުގެ ދަރަނީގެ ފައިނޭންޝަލް އޮޑިޓެއް ކޮންމެ ކުއާޓާއެއްގައި ހެދުމަށެވެ. އީވާގެ ހުށައެޅުމުގައި ވަނީ ބަލިމަޑުކަމުގެ މިފަދަ ދަނޑިވަޅެއްގައި ޚާއްޞަ އަހަމިއްޔަތެއް ދީގެން އޮޑިޓެއް ކުރުމަކީ ބައިނަލްއަޤްވާމީ އޮޑިޓް ނިޒާމުގައި ބާރުއަޅާކަމެއްކަމަށާއި، ދައުލަތުގެ މާލިއްޔަތާއި މިލްކިއްޔާތާއި ދަރަނި އޮޑިޓްކުރުމަކީ ޤާނޫނު އަސާސީއާއި އޮޑިޓަރ ޖެނެރަލްގެ ޤާނޫނުން އޮޑިޓަރ ޖެނެރަލަށް ލާޒިމްކޮށްފައިވާކަމެއްކަމަށެވެ.
ކޮވިޑްގެ ސަބަބުން އާއިލާތަކާއި ވިޔަފާރިތަކުގެ އާމްދަނީއަށް އަންނަ ނުރަނގަޅު ބަދަލުތަކުން އަރައިގަތުމަށް ސަރުކާރުން ހިންގުމަށް ނިންމާފައިވާ ޕްރޮގްރާމް މަޖިލީހުގެ 12 ކޮމިޓީއަކަށް ދިރާސާކުރުމަށް ހުށައަޅާފައިވެއެވެ. އަދި މި ކޮމިޓީތަކުން ސަރުކާރަށް ހުށައެޅުމަށް 300 އަށްވުރެ ގިނަ ހުށައެޅުން ރިޕޯޓްތަކުގައި ހިމަނާފައިވާއިރު، އެ ހުށައެޅުންތަަކަށް ސަރުކާރުން ރިޢާއަތްކުރާކަމަށް މަޖިލީހުގެ ރައީސް ވަނީ ވިދާޅުވެފައެވެ.
