ސަމާލުވޭ! ރެސްޓޯރެންޓްތަކުގައި ވައިރަސް ފެތުރޭގޮތް އެނގޭތަ؟
ލޮކްޑައުންގައި ތިބޭ އިރު ގިނަބަޔަކު އެންމެ އުއްމީދު ކުރާނީ މިކަން ނިމުމުން ރެސްޓޯރަންޓަކަށް ވަދެ ކާލުމެވެ. ގޭގައި ކައްކާ އެއްޗެހި ކައިކައި އެހެން އެއްޗެއްގެ ރަހަބަލާލަން ބޭނުންވެއެވެ. މޮޅު ކައްކާއަކު ކައްކާފައިވާ ކެއުމެއް ކާލަން ބޭނުންވެއެވެ. ނަމަވެސް ރެސްޓޯރެންޓަކީ ކިހާ ރައްކާތެރި ތަނެއްކަން ވިސްނާލިން ހެއްޔެވެ؟
ޖަޕާނުން އާންމުކޮށްފައިވާ ވީޑިއޯއަކުން ވަނީ، ރެސްޓޯރެންޓްތަކުގައި ވަރަށް ފަސޭހައިން ވައިރަސް ފެތުރިގެން ހިނގައިދާނެކަން ފެނިފައެވެ. ޖަޕާނުގެ އެން.އެޗް.ކޭ އަދި ސިއްޙީ މާހިރުން ގުޅިގެން އުފައްދާފައިވާ މި ވީޑިއޯގައި، ފްލޮރިސެންޓް ކުލައިން ވިދާ އެއްޗެއް ބޭނުންކޮށްގެން ވައިރަސް އެކަކު އަނެކަކަށް ވާޞިލްވާ ފަސޭހަ ގޮތް ވަނީ ދައްކާފައެވެ.
މިގޮތުން އެއްފަހަރާ 10 މީހުން ވަނުން ހުއްދަކޮށްފައިވާ ރެސްޓޯރެންޓެއްގައި، ހުރި އެކަކު އަތުގައި އުނގުޅާފައި ހުރި މި ވިދާ އެއްޗެއް އޭނާގެ އަތުން އެތަނުގައި ހުރި ބުފޭ ސްޓޭންޑަށް ވާޞިލްވެއެވެ. ދެން އެ ސްޓޭންޑުން އެހެން މީހުނަށް މި އެއްޗެއް އަރައެވެ. ރެސްޓޯރެންޓްގައި އެންމެންވެސް ވަރަށް ފަރުވާތެރިވެގެން އެއްޗެހީގައި އަތްލާ އުޅޭތަން ފެނެއެވެ. މި އެކްސްޕެރިމެންޓް ނިމުން، އެތަނުގައި ދިއްލާފައި ހުރި ބޮކި ނިވާލުމުން، އެތަނުގައި ހުރި ތަށި ސަމުސާ ފަދަ ތަކެތީގެ އިތުރުން ބައެއް މީހުންގެ މޫނުގައިވެސް މި އުނގުޅިފައި ހުއްޓެވެ.
ދެވަނަ އަށް ކުރި އެކްސްޕެރިމެންޓްގައި އެތަނަށް ވަންނަ ކޮންމެ މީހަކު ވަނުމާއިއެކު އަތްދޮވެ، ކެއުމުގެ ތެރޭގައިވެސް ސަމުސާފަދަ ތަކެތި އިތުރަށް ފަރުވާތެރިވެގެން ސާފުކޮށް، ރައްކާތެރިކަމުގެ އެތައް ކަމަކަށް އިތުރަށް ސަމާލުވެއެވެ.
ދެ ވީޑީއޯ އާ ބެހޭގޮތުން ވާހަކަ ދައްކަމުން ހޮންގކޮންގ ޔުނިވަރސިޓިގެ ޕެތޮލޮޖީ ޕްރޮފެސަރު ޖޯން ނިކޮލަސް ސީ.އެން.އެން އަށް މައުލޫމާތު ދެމުން ހާމަ ކުރި ގޮތުގައި، މި ޓެސްޓްތަކުން މި ފެނުނީ ވައިރަސްއަކީ ވަރަށް ފަސޭހައިން ފެތުރޭ އެއްޗެއް ކަމާއި ނަމަވެސް ސާފުތާހިރު ކަމުގެ ފިޔަވަޅުތަކާއެކު މި ވައިރަސް ފެތުރުން ހުއްޓުވޭނެ ކަން ކަމަށެވެ.
