މާލެ އަންނަން ބޭނުންވި 2997 މީހަކަށް ހުއްދަ ދެވިފައިވޭ: ފުލުހުން
ރަށްރަށުގައި ތިބި މާލޭގައި ދިރިއުޅޭ މީހުންގެ ތެރެއިން މާލެ ނާދެވިފައި ތިބި 2997 މީހަކަށް ހުއްދަ ދީފައިވާނެ ކަމަށް ފުލުހުން ބުނެފިއެވެ.
ފުލުހުން ބުނީ މިދިޔަ އޭޕްރީލް މަހުގެ 24 އިން ފެށިގެން މިމަހުގެ 15 ވަނަ ދުވަހުގެ ނިޔަލަށް ޖުމުލަ 2997 މީހަކަށް މާލެ އައުމުގެ ހުއްދަވަނީ ދޫކޮށްފަވާ ކަމަށެވެ.
ފުލުހުން އާއްމު ކުރި ތަފާސް ހިސާބުތަކުން ދައްކާގޮތުގައި ކޮވިޑް-19އާ ގުޅިގެން މާލެ ލޮކްޑައުން ވުމާއެކު މާލެއަށް ނާދެވި އަތޮޅުތަކުގައި ތިބި މީހުންނަށް މާލެ އައުމުގެ ހުއްދައަށް އެދި ހުށައެޅުމުގެ ފުރުޞަތު ހުޅުވާލާފައިވަނީ މިދިޔަ މަހުގެ ތެރޭގައެވެ.
ފުލުހުންގެ ހުއްދައަށް އެދި ހުށައެޅުމަށް ދެ ގޮތެއް ވަނީ ހަމަޖައްސާފައެވެ. އެދެގޮތުގެ ތެރެއިން މެއިލް މެދުވެރިކޮށް 1923 މީހަކު ހުއްދައަށް އެދިފައިވާއިރު ފުލުހުންގެ ޕޯޓަލް މެދުވެރިކޮށް 1074 މީހުންވަނީ ހުއްދައަށް އެދިފައެވެ.
އަތޮޅުތެރޭގެ ރަށްތަކުގައި ތިބި މީހުން މާލެ ގެނައުމުގެ މަސައްކަތް ކުރަމުންދާއިރު ލޮކްޑައުންއާ ގުޅިގެން މާލޭގައި ރަށައް ނުދެވި ތާށިވެފައި ތިބި މީހުންވެސް އެމީހުންގެ ރަށައް ފޮނުވުމުގެ މަސައްކަތް ދަނީ ކުރަމުންނެވެ.
Ads by STO
