ލޮކްޑައުންއާ ހިލާފުވި މީހުންގެ ޖޫރިމަނާގެ ގޮތުގައި މިހާތަނަށް 4 މިލިއަން ރުފިޔާ ލިބިއްޖެ
ލޮކްޑައުންއާ ހިލާފުވި މީހުންގެ ޖޫރިމަނާގެ ގޮތުގައި މިހާތަނަށް ހަތަރު މިލިއަންވުރެ ގިނަ ރުފިޔާ ދައުލަތަށް ލިބިއްޖެއެވެ.
ލޮކްޑައުންގައި މަގުމަތީގައި އުޅޭ މީހުން ޖޫރިމަނާ ކުރަމުންދަނީ، 1،000 ރުފިޔާއިންނެވެ.
ފުލުހުން މައުލޫމާތުގައި ވާގޮތުން މިހާތަނަ މިއަދާ ހަމައަށް ޖުމްލަ 4113 މީހަކު ވަނީ ލޮކްޑައުންއާ ހިލާފުވެގެން ޖޫރިމަނާ ކޮށްފައެވެ. އެހެންކަމުން އެ މީހުން ޖޫރިމަނާ ކޮށްގެން ދައުލަތަށް 4،113،000 ރުފިޔާ ލިބިފައިވެއެވެ.
މާލެއިން ކޮވިޑް-19 އަށް މީހުންތަކެއް ފައްސި ވަމުންދާތީ ސަރުކާރުން ވަނީ މާލެ ސަރަހައްދުގައި އިއުލާންކޮށްފައިވާ 14 ދުވަހުގެ ލޮކްޑައުންގެ މުއްދަތު އިތުރުކުރަން ނިންމާފައެވެ.
އެ ހާލަތުގައި މަގުތަކަށް ނިކުމެ އުޅޭ މީހުންނަށް ދެން ނަސޭހަތެއް ނުދޭނެ ކަމަށާއި ދެން ވަގުތުން ކުރާނީ ޖޫރިމަނާ ކަމަށް ފުލުހުން ވަނީ މީގެކުރިން ބުނެފައެވެ.
ކޮވިޑް-19 ފެތުރުން ހުއްޓުވުމަށްޓަކައި ހުރިހާ ރައްޔިތުންގެ އެއްބާރުލުމާއި އެހީތެރިކަމަށް ބޭނުންވާ ކަމަށް ފުލުހުން ވަނީ އެދިފައެވެ.
