ދިރާގާއި އުރީދޫގެ ހިދުމަތްތައް ރަނގަޅު : މަލީހް
ކޮވިޑް-19 އާ ގުޅިގެން އިންޓަނެޓް ބޭނުން ކުރުން އިތުރުވެފައިވާ މި ދަނޑިވަޅުގައި، އެ ހިދުމަތް ފޯރުކޮށްދޭ ކުންފުނިތަކުން ޕެކޭޖުތަކެއް ތައާރަފް ކުރުމާއި، ލުއިތަކަކާއި އެކު ދޭ ހިދުމަތުގެ ފެންވަރު ރަނގަޅުކަމަށް ކޮމިއުނިކޭޝަން މިނިސްޓަރު މުހައްމަދު މަލީހް ޖަމާލް ވިދާޅުވެއްޖެ އެވެ.
މަލީހް މިހެން ވިދާޅުވީ ދުނިޔޭގެ ޓެލެކޮމިއުނިކޭޝަން އަދި އިންފޮމޭޝަން ސޮސައިޓީ ދުވަހުގެ މުނާސަބަތުގައި ދެއްވި ހިތާބުގައެވެ.
މީގެ އިތުރުން، އެހެން ގައުމުތަކެކޭ ވެސް އެއްގޮތަށް ކޮވިޑުގެ ނުރައްކަލުގައި އެންމެ މުހިންމު އެއް ވަސީލަތެއްގެ ގޮތުގައި ވެފައިވަނީ އިންފޮމޭޝަން އެންޑް ކޮމިއުނިކޭޝަން ޓެކްނޮލޮޖީ (އައިސީޓީ) ގެ ކަމަށާއި އެގޮތުން ޖަލްސާތަކާއި އޮފީސްތަކުގެ މަސައްކަތްތަކަށް އޮންލައިންކޮށް ކުރިޔަށް ގެންދަން ޖެހިފައިވަނީ އިންޓަނެޓުގެ ޒަރިއްޔާއިން މަލީހް ފާހަގަކުރެއްވިއެވެ.
" އަދި ދުވަހުން ދުވަހަށް ފައިބަރ ނެޓްވާރކާ ގުޅާލެވޭ ރަށްތައް އިތުރުވެ މިހާރު ރާއްޖޭގެ އާބާދީގެ ބޮޑު ބަޔަކަށް ފައިބަރ ނެޓްވާރކް މެދުވެރިކޮށް ބްރޯޑްބޭންޑް އިންޓަރނެޓް ޚިދްމަތް ލިބޭކަން އުފަލާއެކު ފާހަގަކުރަމެވެ. ރާއްޖޭގެ އެންމެހާ ކަންކޮޅުތަކަށް މޯބައިލް ފޯނާއި 4ޖީ ގެ ޚިދްމަތް ފޯރާފައި ވާއިރު، އެންމެ ފަހުގެ 5ޖީ ޓެކްނޮލޮޖީގެ ޚިދްމަތްވެސް ރާއްޖޭގެ ފޯރުކޮށްދޭން ވަނީ ފަށާފައެވެ." މަލީހު ވިދާޅުވިއެވެ.
ހަމައެހެންމެ ރާއްޖޭގައި މިހާރުވެސް ސިއްހީ ހިދުމަތްތަކާއި ތައުލީމު ވެސް މިވަގުތު ފޯރުކޮށްދެމުން ދަނީ އޮންލައިން ޕްލެޓްފޯމުތަކުގައި ކަން ފާހަގަކޮށް، މަލީހު ވިދާޅުވީ މިހާލަތުގައި މުވާސަލާތީ ހިދުމަތްތައް އެދެވޭ ފެންވަރެއްގައި ގާއިމް ކުރެވިފައި ހުރުމަކީ މުހިންމުކަމެއް ކަމަށެވެ.
ހަމައެހެންމެ މަލީހު ވަނީ ކޮވިޑާއި ގުޅިގެން ޓެލެކޮމް ކުންފުނިތަކުން ދެމުން އަންނަނީ ރަނގަޅު ހިދުމަތްތަކެއް ކަމަށް ވިދާޅުވެފައެވެ. އެގޮތުން ތެރޭގައި ޑޭޓާ ޕެކޭޖުތަކެއް ތައާރަފް ކުރުމާއި، ބިލްތައް ދެއްކުމުގައި ލުއިތަކެއް އަދި ޑިސްކައުންޓުތަކެއް ދީފައިވާ ކަން މަލީހު ފާހަގަކުރެއްވިއެވެ.
