ދެ ޒޯނަކަށް އެމްޓީސީސީން ފެރީ ހޯދަނީ
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ދެ ޒޯނަކަށް ފެރީގެ ޚިދުމަތް ދިނުމަށް އުޅަނދުފަހަރު ހޯދުމުގެ މަސައްކަތް ފަށައިފިއެވެ.
އެގޮތުން އެމްޓީސީސީން ބުނެފައި ވަނީ އެކުންފުނިން ފެރީގެ ޚިދުމަތް ފެށުމަށް ނިންމާފައި ވަނީ ހއ. އާއި ހދ. ޒޯނުގެ އިތުރުން ނ. އަތޮޅުގައި ކަމަށެވެ. މިދެ ޒޯނަށް ބޭނުންވާ ފެރީ ކުއްޔަށް ދޭނެ ފަރާތެއް ހޯދަމުންދާ ކަމަށް އެކުންފުނިން ބުނެފައިވެއެވެ.
އެހެންކަމުން މި މަސައްކަތް ކުރަން ޝައުގުވެރިވާ ފަރާތްތަކުން މި ހިނގާ ޑިސެމްބަރު މަހުގެ 13 ވަނަ ދުވަހު މައުލޫމާތު ސާފު ކުރުމަށްފަހު، މި މަހުގެ 20 ގެ ކުރިން ބިޑް ހުށަޙެޅުމަށް އެމްޓީސީސީ އިން އެދިފައިވެ އެވެ.
އެމްޓީސީސީ އަކީ ރާއްޖޭގެ އެކި ހިސާބުތަކަށް ފެރީ ގެ ޚިދުމަތްތައް ދެމުން އަންނަ އެންމެ ބޮޑު ކުންފުންޏެވެ. ރާއްޖޭގެ އެންމެ ފުރަތަމަ ޕަބްލިކް ކުންފުނީގެ ގޮތުގައި އެމްޓީސީސީ އިންކޯޕޮރޭޓް ވެފައިވަނީ 1980 ވަނަ އަހަރުގެ ޑިސެމްބަރު މަހުގެ 18 ވަނަ ދުވަހުގައެވެ.
