ކޮވިޑް-19 ނެތް އަތޮޅުތައް ޓޫރިސްޓުންނަށް ހުޅުވާލަން ސޮނެވާގެ ވެރިޔާ ގޮވާލައިފި
ކޮވިޑް-19ގެ އަސަރު ނެތް އަތޮޅުތަކުގައި ވީހާވެސް އަވަހަށް ފަތުރުވެރިކަން އަލުން ފަށަން ޖެހޭ ކަމަށް މރާއްޖޭގެ ސޮނެވާގެ ވެރިޔާ ސޯނޫ ޝިވްދަސާނީ ވިދާޅުވެއްޖެ އެވެ.
ޓްރޭޑް މޯލްޑިވްސްގައި ޝާއިއު ކުރެއްވި ލިޔުމެއްގައި ސޯނޫ ވިދާޅުވީ، ރާއްޖޭގެ އިގްތިސާދު ކުރިއަރުވައި ރިސޯޓުތައް ބަނގުރޫޓު ވުމުން ސަލާމަތް ކުރުމަށް އަތޮޅުތައް ހުޅުވައިލަން ޖެހޭ ކަމަށް ވިދާޅުވި އެވެ.
އޭނާ ދެކިލައްވާ ގޮތުގައި އެހެން އަތޮޅުތަކުގެ ރިސޯޓުތައް ޓޫރިސްޓުންނަށް ހުޅުވުމުން، ކޮރޯނާވައިރަސް އެންމެ ގަދައަށް ފެތުރެމުންދާ މާލެ ސަރަހައްދު ކޮމިއުނިޓީ ސްޕްރެޑުން ސަލަމާތް ކުރެވޭނެއެވެ.
ސޯނޫ ވިދާޅުވީ، މިވަގުތު ރިސޯޓުތައް ބަނގުރޫޓު ނުވި ނަމަވެސް ގިނަ ދުވަހަށް ބޯޑަރު ބަންދު ކޮށްފި ނަމަ ރިސޯޓުތަކުގެ ފައިސާ ހުސްވެ، އިންވެސްޓަރުންގެ އިތުބާރު ގެއްލޭނެ އެވެ. މީގެ ސަބަބުން ލޯނުތައް ނުދެއްކި ގިނަ އަދަދެއްގެ މުވައްޒަފުން ވަކިކުރަންޖެހޭ ހާލަތަށް ވެއްޓުމަކީ އެކަށީގެންވާ ކަމެއް ކަމަށް އޭނާ ވިދާޅުވި އެވެ.
ރާއްޖެއަށް ޓޫރިސްޓުން އައުމުގެ ހުއްދަ ދިން ނަމަވެސް ހުރިހާ ޓޫރިސްޓުން ވެސް ކޮވިޑަށް ޓެސްޓު ކުރަން ޖެހޭނެ ކަމަށް އޭނާ ވިދާޅުވި އެވެ.
"އަޅުގަނޑު ގަބޫލެއް ނުކުރަން ރާއްޖެ އަންނަން ހުއްދަ ދޭން ޖެހޭނީ ހަމައެކަނި މަހުޖަނުންނަށް ކަމަށް. އަޅުގަނޑު މި ބުނަނީ ކުދި ބޯޓުތައް، ރީޖަނަލް އެއާޕޯޓުތަކަށް ދިއުމުގެ ހުއްދަ ދިނުމަކީ ޓޫރިޒަމް މަޑުމަޑުން ހުޅުވައިލުމަށް އެޅޭނޭ ފިވަޅެއް ކަމަށް. މީގެ ސަބަބުން މާލެ ވެސް ރައްކާތެރިވާނެ،" ސޯނޫ ވިދާޅުވި އެވެ.
ސޯނޫ ދެކިއްލާވާ ގޮތުގައި ރާއްޖެއިން ކޮވިޑް ފޮހެލެވެންދެން ބޯޑަރު ބަންދުކޮށްފައި ބަހައްޓައިފި ނަމަ ޓޫރިޒަމް ދާއިރާ އެއްކޮށް ނެތިގެންދާނެ އެވެ.
