އެޗްއާރުސީއެމް މެމްބަރުން ވަކިކުރުމުގެ މައްސަލަ ކޮމިޓީއަށް ފޮނުވައިފި
ހިއުމަން ރައިޓްސް ކަމިޝަން (އެޗްއާރުސީއެމް)ގެ މެމްބަރުން ވަކި ކުރުމުގެ މައްސަލަ ދިރާސާކޮށް ކުރިއަށް ގެންދަން ޖެހޭ އިޖުރާއަތްތައް ކުރިއަށް ގެންދިއުމަށް ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑާ ކޮމިޓީއަށް ފޮނުވައިފި އެވެ.
މިއަދުގެ ޖަލްސާގައި މަޖިލީހުގެ ރައީސް މުހައްމަދު ނަޝީދު ވިދާޅުވީ އެޗްއާރުސީއެމް މެމްބަރުން ވަކިކުރުމަށް ކުރަން ޖެހޭ ކަންކަން ކުރިއަށް ގެންދިއުމަށް އެދި ހިއުމަން ރައިޓްސް ކޮމިޓީގެ މުގައްރިރު ޖީހާން މަހުމޫދު އެމަނިކުފާނަށް ސިޓީއެއް ފޮނުވާފައިވާ ކަމަށެވެ.
މަޖިލީހުގެ ގަވާއިދުގައި މިހާރު އޮންނަ ގޮތުން، ދައުލަތުގެ މަގާމެއްގައި ހުންނަ ފަރާތެއްގެ އިތުބާރު ނެތްކަމުގެ މައްސަލަ މަޖިލީހުގައި ކުރިއަށް ގެންދެވޭނީ، މަޖިލީހުގެ ރައީސް އެކަން ތަޅުމުގައި އިއުލާން ކުރުމަށް ފަހު އެވެ. އެއަށް ފަހު އެ މައްސަލަ ދިރާސާ ކުރުމުގެ މަސައްކަތް ކަމާ ގުޅޭ ކޮމިޓީއަކަށް ފޮނުވާނެ އެވެ.
މުސްތަގިއްލު މުއައްސަސާތަކާއި މުސްތަގިއްލު މަގާމުތަކުގައި ތިއްބަވާ ބޭފުޅުން މަގާމުން ވަކިކުރުމަށް ކޮމިޓިން ނިންމައިފި ނަމަ، މަޖިލީހުގައި ގަވައިދުގައިވާ ގޮތުން މަގާމުން ވަކިކުރަން ބޭނުންވާނީ އެ ޖަލްސާއަކަށް ހާޒިރުވެ، ވޯޓުގައި ބައިވެރިވެވަޑައިގެންނެވި މެމްބަރުންގެ އަޣުލަބިއްޔަތު ވޯޓެވެ
އެޗްއާރުސީއެމްގެ މެމްބަރުން ވަކި ކުރުމުގެ މައްސަލަ ތާވަލްކޮށްފައިވާ އިރު ކޮވިޑް-19 އާއި ގުޅިގެން މީހުންގެ ހައްގުތައް ކަށަވަރު ކުރުމަށް އެކޮމިޝަނަށް އެދެވޭ މަސައްކަތްތަކެއް ކުރެވިފައި ނުވާކަމަށް ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑާ ކޮމިޓީއިން އެކުލަވާލި ރިޕޯޓުގައި ވަނީ ފާހަގަކޮށްފައެވެ.
އެ ރިޕޯޓުގައި ވަނީ ކޮވިޑް-19 އާއި ގުޅިގެން އެތައް ބައެއްގެ ވަޒީފާ ގެއްލި ބިކަވެފައިވާ އިރު އެކަމާއި ގުޅޭގޮތުން ކަމިޝަނުން ދެކޭގޮތެއް އަދި އަޅާފައިވާ ފިޔަވަޅެއް އެނގެން ނެތްކަމަށެވެ. އަދި ރާއްޖޭގެ ޖަލުތަކުގެ ހާލަތު ބަލައި ޖަލުތަކުގައި ތިބޭ މީހުންގެ މުއާމަލާތްތައް ހުއްޓިފައިވާ އިރު އެކަމާއި ގުޅޭ މައްްސަލަތައް އެޗްއާރުސީއެމްއަށް ހުށަހެޅޭނެ ހަމަޖައްސާފައި ނުވާކަމަށެވެ.
މީގެ އިތުރުން ދައުލަތުގެ ބެލުމުގެ ދަށުގައި މީހުން ތިބޭ ތަންތަނުގެ ހާލަތު ބެލުމަށް އެޗްއާރުސީއެމުން އެއްވެސް ޒިޔާރަތެއް ކޮށްފައި ނުވާކަން ފާހަގަ ކުރެވިފައިވާކަމަށް ކޮމިޓީން އެކުލަވާލި ރިޕޯޓުގައި ފާހަގަކޮށްފައިވެއެވެ.
އެޗްއާރުސީއެމްގައި މިވަގުތު ތިއްބަވަނީ އާމިނަތު އީނާސް (ކޮމިޝަންގެ ރައީސް) އާއި މުހައްމަދު ޒާހިދު (ކޮމިޝަންގެ ނައިބު ރައީސް) އާއި މޫސާ އަލީ ކަލޭފާނާއި ނައިވީން އަބްދުﷲ އަދި އާއިޝަތު އަފްރީން މުހައްމަދެވެ.
މި ފަސް މެމްބަރުން އެޗްއާރުސީއެމްއަށް އައްޔަންކޮށްފައިވަނީ ކުރީގެ ރައީސް ޔާމީން އަބްދުލް ގައްޔޫމްގެ ވެރިކަމުގައެވެ.
