މި ހާލަތުގައި ވެސް އެންމެ ގިނައިން ގޫގުލް ކުރި މަންޒިލަކަށް ރާއްޖެ!
ދުނިޔޭގައި ކޮވިޑްގެ ބަލިމަޑުކަން ފެށުނު ފަހުން ވެސް އެންމެ ގިނަ މީހުން ދަތުރު ކުރުމަށް ގޫގަލް ކުރި މަންޒިލަކަށް ރާއްޖެ ވެއްޖެއެވެ.
ގޫގްލްގެ ސާޗް ޑޭޓާ ދައްކާގޮތުން "ފްލައިޓްސް ޓު މޯލްޑިވްސް" އަދި "ޓްރިޕްސް ޓު މޯލްޑިވްސް" މި ދެ ފްރޭޒްއަކީ އެންމެ ގިނައިން މީހުން މި ބަލިމަަޑުކަމުގެ ދުވަސްވަރު ހޯދާފައިވާ ދެ އިބާރާތެވެ. މިޑޭޓާއަކީ އޭޕްރިލް 1 މޭ 11 އަށް އެންމެގިނައިން އެމެރިކާ ސަރަހައްދުން ގޫގްލް މެދުވެރިކޮށް ކޮށްފައިވާ ސާޗްތަކެވެ.
މިދިޔަ އަހަރު އެމެރިކާ ބައްރުން އެންމެ ގިނަ މީހުން ގޫގްލް މެދުވެރިކޮށް ސާޗް ކޮށްފައިވާ މަންޒިލަކީވެސް ރާއްޖެއެވެ.
މީގެ އިތުރުން ކޮވިޑާގުޅިގެން ގައުމުތަކުގައި އަޅާފައިވާ ލޮކްޑައުންގެ ފިޔަވަޅުތައް ލުއިކުރުމުން އެންމެ އަވަހަށް ސެލެބްރިޓީން ދާނެ 8 މަންޒިލްގެ ތެރޭގައިވެސް ރާއްޖެ ހިމެނޭ ކަމަށް އިނގިރޭސިވިލާތުގެ ސެލެބްރިޓީ ނިއުސް ސައިޓް ހެލޯ މެގަޒިންއިންވެސް ވަނީ ރިޕޯޓްކޮށްފައެވެ.
ކޮވިޑާ ގުޅިގެން މިހާރު ރާއްޖޭގައި ފަތުރުވެރިކަން އެއްކޮށް ހުއްޓިފައިވާއިރު، ހާލަތު ރަނގަޅުވެ ޖުލައި މަހުގެ ތެރޭގައި އަލުން ރާއްޖެ ފަތުރުވެރިކަމަށް ހުޅުވާލި ނަމަވެސް މިއަހަރު ރާއްޖެއަށް ޒިޔާރަތް ކުރާ ފަތުރުވެރިން އަދަދު 50 ޕަސެންޓް ދަށް ވާނެ ކަމަށް ފިނޭންސް މިނިސްޓްރީން ވަނީ ލަފާ ކޮށްފައެވެ.
ރާއްޖޭގެ ފަތުރުވެރިކަން އަލުން ހުޅުވުމަށް ހާއްސަ އުސޫލުތައް ކަޑައަޅާ ގިނަ ތައްޔާރީތައް ސަރުކާރުގެ ކަމާބެހޭ ފަރާތްތަކާއި، ފަތުރުވެރިކަމުގެ ސިނާއަތުގައި ހަރަކާތްތެރިވާ ސްޓޭކްހޯލްޑަރުން ދަނީ ކުރަމުންނެވެ.
