އަލްހަމްދުލިﷲ! މަނަދޫއިން ފައްސިވި 80 އަހަރު މީހާ ރަނގަޅުވެއްޖެ
ނ. މަނަދޫން ކޮވިޑަށް ފައްސިވި 80 އަހަރުގެ މީހާ ބަލިން ރަނގަޅުވެ ވެފައިވާކަމަށް ހެލްތް މިނިސްޓަރު ޢަބްދުﷲ އަމީން ވިދާޅުވެއްޖެއެވެ.
ދައުލަތުގެ މީޑިއާ "ޕީއެސްއެމް" އަށް ދެއްވި ޚާއްސަ އިންޓަވިއުއެއްގައި މިނިސްޓަރު އަމީން ވިދާޅުވީ ރާއްޖެއިން ބައްޔާއި ދެކޮޅަށް ކުރަމުންދާ މަސައްކަތްތަކުން ބޮޑެތި ކުރިއެރުންތަކެއް ލިބެމުންދާކަމަށެވެ. އަދި އެންމެ ބޮޑު ސަލާމުކަމެއް މިވަގުތު ހުރީ ބަލި ޖެހިފައިވާ މީހުންނަށް ދޭންޖެހޭ ފަރުވާދީ އެމީހުންގެ ކަންކަން ބެލެހެއްޓުމަށް ކަމަށްވެސް މިނިސްޓަރު ވިދާޅުވިއެވެ.
އަމީން ވިދާޅުވީ މިވަގުތު ބަލިޖެހިފައިވާ މީހުންގެ ތެރެއިން ގިނަ ބަޔަކު ބަލިން ރަނގަޅުވަމުންދާއިރު، މީގެ ތެރޭގައި އުމުރުން ދުވަސްވީ މީހުންވެސް ހިމެނުމަކީ ލިބޭ ހިންހަމަޖެހުމެއް ކަމަށެވެ.
އެގޮތުން އުމުރުން ދުވަސްވީ މީހުންގެ ތެރެއިން މަނަދޫއިން ފައްސިވި އުމުރުން 80 އަހަރުގެ މީހާ އަށް އައިޖީއެމްއެޗްގައި ފަރުވާދީ އެމީހާ ކޮވިޑަށް އެންމެފަހުން ކުރި ޓެސްޓްތަކުން ނައްސިވެފައިވާ ކަމަށް އަމީން ވިދާޅުވިއެވެ.
އަމީން ވަނީ ރާއްޖޭގައި ބަލި ފެންނަމުންދާ މިންވަރު މިހާލަތުގައި މަދުނަމަވެސް މިކަމުގައި އެއްވެސް ރައްޔިތަކު ފަރުވާކުޑަނުކުރުމަށް އިލްތިމާސް ކުރައްވާފައެވެ.
