ޑރ. އަފްޒަލްގެ އިލްތިމާސް: އަބަދު ގޭގައި ތިބޭ އިރު ބަރުދަން އިތުރުވެދާނެ، ކަސްރަތުކުރައްވާ!
ކޮވިޑް-19ގެ ސަބަބުން މާލެއާއި ބައެއް ރަށްތައް ލޮކްޑައުން ކޮށްފައިވާއިރު، މި ދުވަސްވަރު އަބަދު ގޭގައި ތިބެން ޖެހުމުން ބަރުދަން އިތުރުވެދާނެތީ ކަސްރަތު ކުރުމަށް ހާއްސަ ސަމާލުކަމެއް ދިނުމަށް ޑރ. އިބްރާހީމް އަފްޒަލް އިލްތިމާސްކުރައްވައިފި އެވެ.
މިރޭ ބޭއްވި ނޫސްވެރިންގެ ބައްދަލުވުމުގައި ޑރ. އަފްޒަލް ވިދާޅުވީ ރޯދަމަހަށް ވެސް ވުމާއެކު ގެއިން ބޭރަށް ނުނިކުމެވި އަބަދު ގޭގައި ތިބޭއިރު ބަރުދަން އިތުރުވެދާނެ ކަމަށެވެ. އެހެންކަމުން ގޭގައި ތިބެގެން ކަސްރަތު ކުރުމަކީ ވަރަށް މުހިންމު ކަމެއް ކަމަށް އޭނާ ވިދާޅުވިއެވެ.
ޑރ. އަފްޒަލް ވަނީ ޖިމުގައި ބޭނުންކުރާ ވަސީލަތްތަކާއި ނުލައި ކުރެވޭ ކަސްރަތުތަކުގެ މައުލޫމާތު ޓީވީ މެދުވެރިކޮށް އާންމުންނަށް ވީހާވެސް ގިނައިން ދެއްކުމަށް އެދިވަޑައިގެންފަ އެވެ.
"އެއީ ހަގީގަތުގައި މި ބައްޔަށް ބަލައިފި ކަމުގައި ވިޔަސް ހަށިގަނޑު ދުޅަހެޔޮ މީހާގެ ހަށިގަނޑަށް މި ބަލީގެ އަސަރުކުރާ މިންވަރު ނިސްބަތުން ވަރަށް މަދު. އޭގެ ތެރޭގައި އެއްގޮތަކަށް ވެސް ސިމްޕްޓޮމް ނުފެނިދާ މީހުންނަށް ބަަލައިފިއްޔާ މިއީ ހަމަ ޒުވާނުންގެ ތެރޭގައި މިކަން މިއޮންނަނީ،" ޑރ. އަފްޒަލް ވިދާޅުވި އެވެ.
އެހެންކަމުން ދުޔަހެޔޮ ސިއްހަތެއްގައި ހުންނަ މީހުންނަށް އެ ބަލި، ދިފާއު ކުރެވޭނެ ކަމަށް އޭނާ ވިދާޅުވި އެވެ.
