ގެސްޓްހައުސްތައް ހުޅުވަން ކައުންސިލުތަކުގެ ހުއްދަ ނަގަން ނުޖެހޭ ގޮތަށް ހަމަޖައްސައިފި
މީހުން ދިރިއުޅޭ ރަށްރަށުގައި ހުރި ޓޫރިސްޓް ހޮޓެލް އަދި ޓޫރިސްޓް ގެސްޓްހައުސްތައް އަލުން ހުޅުވުމުގެ ހުއްދަ ދިނުމުގެ ކުރިން، ސިޓީ ކައުންސިލް ނުވަތަ ރަށު ކައުންސިލުގެ އިއުތިރާޒެއް ނެތްކަމަށް ޓޫރިޒަމް މިނިސްޓްރީއަށް ހުށަހަޅަން ނުޖެހޭނެކަމަށް އެމިނިސްޓްރީން ނިންމައިފިއެވެ.
ކައުންސިލްތަކުގެ ހުއްދަ ނެތި ގެސްޓްހައުސްތައް ހުޅުވުމުގެ ހުއްދަ ދީފައި ވަނީ މިމަހުގެ 15 ވަނަ ދުވަހުން ފެށިގެންނެވެ.
އެނގިފައިވާ ގޮތުގައި ގެސްޓްހައުސްތަކަށް އަންނަ ފަތުރުވެރިން ކަރަންޓީނު ވާން ނުޖެހޭތީ އާއި އަދި ގެސްޓްހައުސްތައް ހުޅުވާފައި ހުންނަ ރަށްތަކުގެ މީހުން އެހެން ރަށްތަކަށް ގޮސް ކަރަންޓީނު ވާން ޖެހޭތީ ގިނަ ކައުންސިލްތަކުން ގެންދަނީ ގެސްޓްހައުސްތައް ހުޅުވުމުގެ ހުއްދަ ދޭން ދެކޮޅު ހަދާ ނުރުހުން ފާޅުކުރަމުންނެވެ.
ނަމަވެސް ޓޫރިޒަމް މިނިސްޓްރީން މިރޭ ނެރުނު ބަޔާނެއްގައި ބުނެފައިވަނީ ދިވެހިރާއްޖޭގައި ކޮވިޑް-19 ފެތުރުން ކޮންޓްރޯލް ކުރުމުގެގޮތުން ރާއްޖޭގެ ގެސްޓްހައުސްތައް ބަންދުކުރުމަށްފަހު، އަލުން ގެސްޓްހައުސްތައް ހުޅުވުމަށް ނިންމައި އާންމު ރައްޔިތުންނާއި، ފަތުރުވެރިންނާއި އަދި މުވައްޒަފުންގެ ސަލާމަތާއި ރައްކާތެރިކަން ކަށަވަރު ކުރުމުގެ ގޮތުން އަލުން ހުޅުވުމުގެ ހުއްދަ ދިނުމުގައި ޓޫރިޒަމް މިނިސްޓްރީއިން އަމަލުކުރަމުން އައި އުސޫލަށް، ބަދަލު ގެނައީ ހާލަތު ރަނގަޅުވަމުން އަންނަ އައުމަށް ރިއާޔަތް ކުރުމަށް ފަހު ކަމަށެވެ.
