ރައީސް ޔާމީން ގެ ހާލުކޮޅު ރަނގަޅު: ސަރުކާރު
5 އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް އަބްދުﷲ ޔާމީންގެ ހާލުކޮޅު ރަނގަޅު ކަމަށް ކޮމިޝަނަރ އޮފް ޕްރިޒަން އަހުމަދު މުހައްމަދު ފުޅު ވިދާޅުވެއްޖެ އެވެ. ކޮމިޝަނަރ އޮފް ޕްރިޒަން މިހެން ވިދާޅުވީ ރާއްޖެޓީވީ އިން ގެނެސްދިން ލައިވް ކަވަރޭޖެއްގައި ވާހަަކަފުޅު ދައްކަވަމުންނެވެ.
ކޮމިޝަނަރ ވިދާޅުވީ ރައީސް ޔާމީންގެ ހާލުކޮޅު ވަރަށް ރަނގަޅު ކަމަށާއި މިހާތަނަށް އެމަނިކުފާނުގެ ހާލާ ގުޅޭ ގޮތުން އެއްވެސް ޝަކުވާއެއް ލިބިވަޑައިގެންފައި ނުވާ ކަމަށެވެ.
"ކަންކަން ކަށަވަރުކުރަމުން ގެންދާ ކަމަށާއި އެމަނިކުފާނުގެ ވެސް މިވަގުތު ހާލުކޮޅު ވަރަށް ރަނގަޅު، ޤަވާއިދުން އަޅުގަނޑުމެން އާންމު ސުސޫލްގެ ތެރެއިން ފުރިހަމަކުރާ ހުރިހާ ކަންކަން ފުރިހަމަ ކުރަމުން މިގެންދަނީ. މިވަގުތާއި ހަމައަށް މި ބައްޔާއި ގުޅުވާ އަދި މިހާލަތާއި ގުޅުވާ އެއްވެސް ޝަކުވާއެއް ލިބިފައި ނުވޭ" ކޮމިޝަނަރ އޮފް ޕްރިޒަންސް ވިދާޅުވިއެވެ.
މީގެ އިތުރުން ރައީސުލްޖުމްހޫރިއްޔާގެ މަޤާމު އަދާކުރައްވާފައިވާ ބޭފުޅުންނާއި ދައުލަތުގެ އިސްމަޤާމުތައް ފުރުއްވަފައި ތިއްބަވާ ބޭފުޅުންނާއި މެދު، ޖަލުގައި އަމަލު ކުރަމުންދަނީ ޚާއްސަ އުސޫލަކުން ކަން ކޮމިޝަނަރ އޮފް ޕްރިޒަންސް ފާހަގަކުރެއްވިއެވެ. އަދި މި އުސޫލު ހިފަހައްޓަމުންގެންދާ ކަމަށް އޭނާ ވިދާޅުވިއެވެ.
ރައީސް ޔާމީންގެ ހާލުކޮޅު ރަނގަޅު ކަމަށް ސަރުކާރުން ވިދާޅުވެފައިވަނީ، އިދިކޮޅު ފަރާތްތަކުން ރައީސް ޔާމީން ގެއަށް ބަދަލުކޮށްދިނުމަށް އެދެމުންދާ ދަނޑިވަޅެއްގައެވެ.
