އެމްއެންޔޫގެ ކިޔެވުން މި މަހުގެ 31 ގައި ފަށަނީ
ކޮވިޑް-19އާ ގުޅިގެން ހުއްޓާލާފައި އޮތް ގައުމީ ޔުނިވަސިޓީ(އެމްއެންޔޫގެ) ކިޔެވުން މިމަހުގެ 31 ގައި ފަށަން ނިންމައިފިއެވެ.
ރައްޔިތުންގެ މަޖިލީހުގެ ގައުމީ ތަރައްގީއާއި ތަރިކަ ކޮމިޓީގައި ވާހަކަ ދައްކަވަމުން ގައުމީ ޔުނިވަސިޓީގެ ޗާންސެލަރު މުހައްމަދު ޝަރީފު ވިދާޅުވީ 31 މާޗުގައި އޮންލައިންކޮށް ކިޔަވައިދިނުމުގެ މަސައްކަތްތައް ފަށަން ނިންމާފައިވާ ކަމަށެވެ.
ޝަރީފް ވިދާޅުވީ އޮންލައިންކޮށް ކިޔަވައިދިނުމަށް މާބޮޑު ދަތިތަކެއް އެ ޔުނިވަސިޓީއަށް ކުރިމަތި ނުވާނެކަމަށާއި ނަމަވެސް ޕްރެކްޓިކަލް ގިނަ މާއްދާތަކެއް ހުރުމުން ހުރިހާ މާއްދާއެއް އޮންލައިންކޮށް ކިޔަވައިދޭ މާއްދާތަކަކަށް ބަދަލުކުރުމަށް ކޮންމެވެސް ވަރެއްގެ ގޮންޖެހުންތަކެއް ހުންނާނެކަމަށެވެ. އެކަމަށް ވަގުތުތަކެއް ނަގާނެ ކަމަށްވެސް އޭނާ ވިދާޅުވި އެވެ.
ކޮމިޓީގައި ވާހަކަދައްކަވަމުން ގައުމީ ޔުނިވާސިޓީގެ ޑެޕިއުޓީ ވައިސް ޗާންސެލާ ޑރ. އާއިޝަތު ޝެހެނާޒް އާދަމް ވިދާޅުވީ ކޮވިޑް19 ގެ އެކި މަސައްކަތްތަކުގައި އެ ޔުނިވާސިޓީގެ 1،300 އަށްވުރެ ގިނަ ދަރިވަރުންނާއި މުވައްޒަފުން ހަރަކާތްތެރިވަމުން ދާކަމަށެވެ.
