ސްޓެލްކޯގެ އެމްޑީގެ މުސާރަ ހާމަކުރަން ޖެހޭ: އިންފޮމޭޝަން ކޮމިޝަން
ސްޓެލްކޯގެ މެނޭޖިން ޑިރެކްޓަރގެ މުސާރައަަކީ ރައްޔިތުންނަށް ސިއްރު ކުރަން ޖެހޭ މައުލޫމާތެއް ނޫންކަމަށާއި އެކަން ހާމަކުރަން ޖެހޭ ކަމަށް އިންފޮމޭޝަން ކޮމިޝަން އޮފީސް (އައިކޮމް) އިން ބުނެފިއެވެ.
އައިކޮމް އިން ނެރިފައިވާ ބަޔާނެއްގައި ބުނެފައި ވަނީ ދައުލަތުގެ މަސްއޫލިއްޔަތެއް އަދާކުރާ އެއްވެސް އިދާރާއެއްގައި މަސައްކަތްކުރާ މުވައްޒަފެއްގެ މުސާރައާއި އިނާޔަތަކީ ރައްޔިތުންނަށް ސިއްރު ވާންޖެހޭ މައުލޫމާތެއް ނޫން ކަމަށާއި އެއީ މައުލޫމާތު ހޯދާ ލިބިގަތުމުގެ ގާނޫނުގެ ދަށުން، މުއައްސަސާގެ އަމިއްލަ އިސްނެގުމަށް ހާމަކުރަން ޖެހޭ މައުލޫމާތެއް ކަމަށެވެ.
އެހެން ކަމުން ސްޓެލްކޯގެ އެމްޑީގެ މުސާރަ ބަޔާންކޮށް ފޮނުވި ސިޓީ އާންމުވި ސަބަބު ތަހުގީގުކުރުމުގެ ބަދަލުގައި ހާމަކަން ބޮޑު ހިންގުމުގެ ސަގާފަތެއް ގާއިމްކުރުމަށް އައިކޮމް އިން ވަނީ ގޮވާލާފަ އެވެ.
އައިކޮމް އިން ބުނީ ހާމަކަން ބޮޑު ހިންގުމުގެ ނިޒާމެއް ގާއިމްކޮށް އެ ސަގާފަތަށް އަހުލުވެރިވުމަކީ ފަސާދަ މަދުވެ، ދައުލަތާއި މެދު ރައްޔިތުންގެ އިތުބާރު ބޮޑުވާނެ ކަމެއް ކަމަށެވެ. އަދި އޭރުން އިދާރާތަކުގެ ތަސައްވަރު ރަނގަޅުވާނެ ކަމަށް ވެސް އައިކޮމް އިން ބުނެ އެވެ.
އައިކޮމް އިން ވަނީ މި މަގަށް ކުންފުނިތަކާއި ދައުލަތުގެ އެންމެހާ އިދާރާތަކުން މަސައްކަތް ކުރުމަށް އިލްތިމާސްކޮށްފަ އެވެ.
ސްޓެލްކޯއިން ރައްޔިތުންގެ މަޖިލީހަށް ފޮނުވި ސިޓީގައިވާ ގޮތުން އެ ކުންފުނީގެ އެމްޑީ ހަސަން މުޣުނީ އަށް އިނާޔަތްތަކާއެކު މަހަކު މަދުވެގެން 98،000ރ. މުސާރައިގެ ގޮތުގައި ލިބެއެވެ. އަދި މިއަދަދަކީ ފިނޭންސުން ކަނޑައަޅާފައިވާ އަދަދެއް ކަމަށް ސްޓެލްކޯއިން ވަނީ ބުނެފައެވެ.
ސްޓެލްކޯއިން މި މަހުގެ ހަވަނަ ދުވަހު ފޮނުވާފައިވާ އެ ސިޓީގައި ބުނެފައިވަނީ މަޖިލީހުގެ އިދާރާގެ ބޭނުމަށް އެ ކުންފުނިން ފޮނުވި ސިޓީއެއް ސޯޝަލް މީޑިއާގައި ލީކުވުމާ ގުޅިގެން އެ ކުންފުންޏާ މެދު ރައްޔިތުން ދެކޭ ގޮތް ބަދަލު ކުރުމަށް ބަޔަކު މަސައްކަތް ކުރަމުން އަންނަ ކަމަށެވެ. އަދި އެ ސިޓީ ބޭނުންކޮށްގެން ދައުލަތާއި ދައުލަތުގެ އިދާރާތަކާ މެދު ނަފުރަތު އުފައްދަން ބަޔަކު މަސައްކަތް ކުރާތީ ސިޓީ ލީކުވި ގޮތެއް ހޯދައި ދިނުމަށް ސްޓެލްކޯއިން ވަނީ އެދިފަ އެވެ.
