" ފެން ކޮންސަމްޝަން އިތުރުވެގެން ބިލް ބޮޑުވެފައިހުރީ"
އާއްމު ގޭބިސީތަކުގައި ފެންބޭނުން ކުރި މިންވަރު ވަނީ އިތުރުވެފައިވާ ނަމަވެސް މި ރޯދަ މަހު، މާލެ ސަރަޙައްދުގައި އެވްރެޖްކޮށް ރޯދަމަހެއްގައި ފެން ބޭނުންކުރާ މިންވަރަށްވުރެ ފެން ބޭނުންކުރި މިންވަރު ދަށްވެފައިވާކަމަށް އެމްޑަބްލިޔުއެސްސީ އިން ހާމަކޮށްފިއެވެ.
އެމްޑަބްލިއުއެސްސީގެ މެނޭޖިންގ ޑިރެކްޓަރ ހަސަން ޝާޙް މިހެން ވިދާޅުވީ ޕީއެސްއެމްނިއުސް އިން ގެނެސްދިން ލައިވް ކަވަރޭޖް އެއްގައި ވާހަކަ ދައްކަވަމުންނެވެ.
ޝާހު އިތުރަށް ވިދާޅުވީ މިދުވަސްވަރަކީ އެހެން އަހަރުތަކުގައި ޢާއްމުގޮތެއްގައި ފެން ބޭނުންކުރާ މިންވަރު އިތުރުވާ ދުވަސްވަރެއްކަމަށާއި ކޮވިޑް19 އާއި ހޫނު މޫސުމުގެ ސަބަބުން ފެން ބޭނުން ކުރާ މިންވަރު އިތުރުވާނެ ކަމަށް ލަފާކުރެވުނު ނަމަވެސް އެވްރެޖްކޮށް ވޭތުވެދިޔަ ދުވަސްތަކުގައި ފެން ބޭނުންކުރި މިންވަރު ދަށަށް ގޮސްފައިވާކަމަށެވެ. އަދި މީގެ މައިގަނޑު ސަބަބެއްކަމުގައި ބެލެވެނީ ލޮކްޑައުންގެ ސަބަބުން ރެސްޓޯރެންޓު ތަކާއި ހޮޓާތައް ބަންދުކުރުން ކަމުގައި ވެސް އޭނާ ވިދާޅުވިއެވެ.
ލޮކްޑައުންއާއި ގުޅިގެން ސަރުކާރުން ދޭން ނިންމާފައިވާ ފެން ބިލުން 30 އިންސައްތަ ޑިސްކައުންޓާއެކުވެސް ފެން ބިލު ބޮޑުވާ ކަމުގެ ޗަކުވާ ލިބެމުން އަންނަ ކަން ފާހަގަކޮށް ޝާހު ވިދާޅުވީ ބިލް ބޮޑުވެފައިހުރީ ހަމަ ފެން ބޭނުން ކުރި މިންވަރު އިތުރު ވުމުން ކަމުގައެވެ.
" އެހެން އެގޮތަށް ދިމާވާން މެދުވެރިވެފައިވަނީ ހުރިހާ ފަރާތަކުންވެސް ގޭގައި ތިބުމާއެކު އެޗްޕީއޭގެ ގަވާއިދާއެއްގޮތަށް ގިނަގިނައިން އަތް ދޮވުމާއި ރައްކާތެރިވުމުގެ ގޮތުން ސާފުތާހިރުކަން އިސްކުރުމުންކަމަށް މިބެލެވެނީ. އެގޮތަށް މިދަންނަވަނީ ކުރިއާ ޚިލާފަށް ގެއިން ބޭރުގައި އުޅުމަށްފަހު ގެއަށް ގޮސް ފެންވެރުމާއި ބޭރުގައި އުޅޭއިރު ލައިގެން ހުންނަ އަންނައުނު ދޮވުން މިހާރު ވަރަށްބޮޑަށް ވަނީ އިތުރުވެފައި. އެހެންކަމުން ހަމަ ފެން ކޮންސަމްޝަން އިތުރުވެގެން ބިލް ބޮޑުވެފައިހުރީ" ޝާހު ވިދާޅުވިއެވެ.
ސަރުކާރުން އިއުލާނުކުރި ސިއްޙީ ކުއްލި ނުރައްކަލުގެ ޙާލަތައި ގުޅިގެން މާޗުމަހު ކޮންމެ ގޭސީއަކަށް ވަނީ އެއްޓަނުގެ ފެން ހިލޭ ދީފައެވެ.
Ads by STO
