ހިންމަފުށިން ނެގި 156 ސާމްޕަލްވެސް ނައްސި
ކ. ހިންމަފުށީގައި ހުންނަ ޑްރަގް ރިހެބިލިޓޭޝަން ސެންޓަރުން ތިން މީހަކު ކޮވިޑަށް ފައްސިވުމާއި ގުޅިގެން ހިންމަފުށީގައި ބަލީގެ ހާލަތު އޮތް މިންވަރު ދެނަގަތުމަށް ނެގި 156 ސާމްޕަލް ވެސް ނައްސި ވެއްޖެ އެވެ.
މިރޭ ބޭއްވި ނޫސްވެރިންގެ ބައްދަލުވުމުގައި ކޮވިޑްގެ ތަރުޖަމާނު މަބްރޫކް އަޒީޒް ވިދާޅުވީ މި ފައްސި ކޭސްތަކާ ގުޅިގެން ހިންމަފުށީގައި ކޮމިއުނިޓީ ސްޕްރެޑެއް އޮތްތޯ ބެލުމަށް ސާމްޕަލްތަކެއް ނަގާފައިވާ ކަމަށެވެ.
އެގޮތުން އައްސޭރި ޖަލުން 36 ސާމްޕަލަކާއި، ޑީޓީއާރްސީން 37 ސާމްޕަލަކާއި، އިންޑަސްޓްރިއަލް ޒޯނުން 45 ސާމްޕަލަކާއި އަދި އެ ރަށުގެ ތެރެއިން ރެންޑަމްކޮށް 28 ސާމްޕަލެއް ނެގިފައިވާ ކަމަށް މަބްރޫކް ވިދާޅުވިއެވެ.
"ޖުމްލަ 146 ސާމްޕަލެއް ނެގިފައިވޭ. އެ ހުރިހާ ސާމްޕަލެއްގެ ނަތީޖާ ވަނީ ލިބިފައި، އެ ހުރިހާ ސާމްޕަލެއްގެ ނަތީޖާ ނެގެޓިވް" މަބްރޫކް ވިދާޅުވިއެވެ.
ފައްސި ކޭސްތަކާ ގުޅިގެން މިދިޔަ އޭޕްރީލް މަހުގެ 13 ވަނަ ދުވަހުގެ ފަހުން އެއްވެސް މީހަކު އެ ސެންޓަރަށް ގެންގޮސްފައިނުވާ ކަމަށް އެންއީއޯސީން ބުންޏެވެ. އެ ދުވަހު ހަތަރު މީހަކު ރިހެބަށް ގެންގޮސްފައިވާއިރު އޭގެ ކުރީ ދުވަހު ހަތަރު މީހުން ވަނީ ގެންގޮސްފައެވެ. މީގެ އިތުުރުން އޭޕްރީލް މަހުގެ ނުވަވަނަ ދުވަހު އެކަކު އަދި 8 ވަނަ ދުވަހު ދެ މީހުން ގެންގޮސްފައިވާ ކަމަށެވެ.
