ސިޔާސީ މީހުންނާއި އަޅުގަނޑުމެންނާ ވިސްނުމުގެ ތަފާތެއް އެބައުޅޭ: މަބްރޫކް

ސިޔާސީ މީހުންނާއި އަޅުގަނޑުމެނާ ވިސްނުމުގެ ތަފާތެއް އެބައުޅޭ ކަމަށް ކޮވިޑް-19ގެ ތަރުޖަމާނު މަބްރޫކް އަޒީޒް ވިދާޅުވެއްޖެއެވެ.

Ads by STELCO

މަބްރޫކް މިހެން ވިދާޅުވީ ބޯޑަރު ބަންދު ކުރުމަކީ ހައްލެއް ނޫން ކަމަށް މަޖިލީހުގެ ރައީސް މުހައްމަދު ނަޝީދު ވިދާޅުވުމާ ގުޅިގެން ނޫސްވެރިޔަކު ކުރެއްވި ސުވާލަކަށް ޖަވާބު ދެއްވަމުންނެވެ.

ކޮމަންވެލްތުން "އިމީޑިއެޓް ރެސްޕޮންސް އެންޑް ފިއުޗާ އޮޕޮޗުނިޓީސް" ގެ ނަމުގައި ޓޫރިޒަމް ދާއިރާއާ ގުޅޭ ގޮތުން ބޭއްވި ވީޑިއޯ ކޮންފަރެންސްގައި ނަޝީދު ވިދާޅުވީގައުމުތަކުގެ ބޯޑަރުތައް ބަންދުކުރުމަކީ، ކޮވިޑް-19 ގެ ހާލަތުން އަރައިގަތުމަށް އޮތް ހައްލެއް ނޫން ކަމަށާއި ވީ އެންމެ އަވަހަކަށް ބޯޑަރުތައް ހުޅުވާލުން މުހިއްމު ކަމަށެވެ.

މިކަމާ ގުޅިގެން މިރޭ ބޭއްވި ނޫސްވެރިންގެ ބައްދަލުވުމުގައި މަބްރޫކް ވިދާޅުވީ ސިޔާސީ ބައެއް ބޭފުޅުން އެ ބޭފުޅުންނަކީ ވެސް ރައްޔިތުންގެ މަންދޫބުން. އެހެންވީމަ އެ ބޭފުޅުން ދައްކަވާ ވާހަކަތައް ވެސް އަޑުއަހަން ޖެހޭ ކަމަށެވެ.

"އަޅުގަނޑުމެންނަށް ލަފަ މި ދެއްވަނީ ޑޮކްޓަރުން. އެކަމަކު މިކަމުގައި ވިސްނުމުގެ ތަފާތެއް އެބައުޅޭ." މަބްރޫކް ވިދާޅުވިއެވެ.

މަބްރޫކް ވިދާޅުވީ ފައިސާ ހޯދުމަށް ބޯޑަރު ހުޅުވާށޭ ސިޔާސީ ބޭފުޅުން ވިދާޅުވި ނަމަވެސް ރައްޔިތުންގެ ސަލާމަތާއި ރައްކާތެރިކަން ނެތިއެއް އިގްތިސޯދުގެ ބޭނުމެއް ނެތް ކަމަށެވެ. އެހެންކަމުން ސަރުކާރުން އަޅާ ހުރިހާ ފިޔަވަޅެއް އަޅާނީ ރައްޔިތުންގެ ސަލާމަތާއި ރައްކާތެރިކަމަށް އެކަނި ކަމަށް އޭނާ ވިދާޅުވިއެވެ.

"އޭގެ ބާކީ އޮތް ޖާގަ މި ބޭނުން ކުރަނީ ކަންކަން ފަސޭހަކޮށްދިނުމަށާއި އިގްތިސާދަށް. ސަރުކާރު މި ވަގުތު އޮޕަރޭޓް ކުރަމުން ދާނީ އެގޮތަށް." މަބްރޫކް ވިދާޅުވިއެވެ.

މިއަދުގެ ކޮންފަރެންސްގައި ނަޝީދު ވިދާޅުވީ، ރާއްޖޭގެ 70 ޕަސެންޓް މީހުން ވަޒީފާ އަދާކުރަނީ ޓޫރިޒަމް ދާއިރާގައި ކަމަށްވާ އިރު ބޯޑަރުތައް ބަންދުކޮށްގެން، ޓޫރިޒަމް ހުއްޓުމަކަށް ގެނެސްފި ނަމަ، މުޅި ދުނިޔޭގެ އިގްތިސާދު އަޑިއަށްގޮސް އިންޓަނޭޝަލް ސްޓެބިލިޓީ ގެއްލޭނެ ކަމަށެވެ.

އެހެން ކަމުން މި ހާލަތުގައި އެންމެ މުހިއްމު ކަމަކީ ބޯޑަރުތައް ހުޅުވާލުން ކަމަށް އެމަނިކުފާނު ވިދާޅުވި އެވެ.