ޞިއްޙީ ޚިދުމަތްތެރިންގެ އިހްތިޖާޖު މީސްމީޑިއާގައި : އިތުރުގަޑީގެ ފައިސާ ދޭން ބަހަނާ ދެއްކުން ބަލައެއް ނުގަންނަން
މިިދިޔަ އާދިއްތަ ދުވަހު ފިނޭންސް މިނިސްޓްރީން ނެރުނު މުސާރައިގެ އާ އުސޫލާ އެކު، ސިއްހީ ހިދުމަތްތެރިންނަށް ގެއަށް ގެންދަން ލިބޭ ވަރު މަދުވެގެންދާނެ ކަމަށް ބުނެ ކޮވިޑް19ގެ ކަންކަމުގައި އެންމެ ބުރަކޮށް މަސައްކަތް ކުރައްވާ ޞިއްޙީ ޚިދުމަތްތެރީން އެކަމާއި ހިތްހަމަ ނުޖެހި ޝުޢޫރު ފާޅު ކުރަން ފަށައިފިއެވެ.
މި ރަމަޟާން މަހުގައި ވެސް އާއިލާއާއި ދުރުގައި ތިބެ މަސައްކަތް ކުރައްވާ ޞިއްޙީ ޚިދުމަތްތެރިން ކުރަމުންދާ ޓްވީޓްތަކުގައި ބުނެފައިވަނީ ''ޞިއްޙީ ޚިދުމަތްތެރިން ލައްވާ ރޯދަމަހު ދުވާލަކު 8 ގަޑިއިރު މަސައްކަތްކޮށްފައި މުސާރަ ދޭންވީމާ ، އިތުރު ގަޑިދޭން ބަހަނާ ދެއްކުމަކީ ބަލައިގަނެވޭނެ ކަމެއް ނޫން'' ކަމަށެވެ. ރައީސުލް ޖުމްހޫރިއްޔާ އިބްރާހީމް މުޙައްމަދު ޞާލިޙާއި ހެލްތު މިނިސްޓަރ އަދި ފިނޭންސް މިނިސްޓަރ ގެ ސަމާލުކަމަށް ގެނެސް ކުރަމުންދާ މި ޓްވީޓްތައް އެތައް ޚިދުމަތްތެރީންނެއް ދަނީ ތަކުރާރު ކުރަމުންނެވެ. މީގެ އިތުރުން ޞިއްޙީ ދާއިރާގެ މެޖޯރިޓީ މުވައްޒަފުންގެ އަސާސީ މުސާރަ އުޅެނީ ހަތަރު ހާހާއި ފަސްހާހާއި ދެމެދުގައިކަމަށާއި އެހެން ނަމަވެސް އެލަވަންސްކޮޅު ކަނޑަމުންދާ ކަމަށް ބައެއް ޚިދުމަތްތެރީން ޓްވީޓް ކުރައްވާފައިވެއެވެ.
ފިނޭންސް މިނިސްޓްރީގެ އާ އުސޫލުގައިވާ ގޮތުން ސަރުކާރުގެ މުވައްޒަފުން ހަފްތާއަކު 48 ގަޑިއިރަށް ވުރެ އިތުރަށް މަސައްކަތް ކޮށްފި ނަމަ އިތުރުގަޑީގެ ފައިސާ ދޭނެ އެވެ.
ރޯދަ މަހު، ސިވިލް ސާވެންޓުންނާ އެއްގޮތަށް ސިއްހީ ހިދުމަތްތެރިން ވެސް ރަސްމީ މަސައްކަތު ގަޑިއަކީ ހަތަރު ގަޑިއިރެވެ. އެކަމަކު އެ މީހުންނަށް ހަ ހަޑިއިރު މަސައްކަތް ކުރަންޖެހޭއިރު، އެ ވަގުތު ކަނޑައަޅާފައިވަނީ އޯޓީގެ ގޮތުގަ އެވެ.
ރޯދަ ނޫން މަސް މަހުގައި، މަސައްކަތު ގަޑިއަކީ ހަފުތާގެ ހަ ދުވަހު، ދުވާލަކު ހަ ގަޑިއިރެވެ. އެކަމަކު އިތުރު ދެ ގަޑިއިރާއެކު އަށް ގަޑިއިރު މަސައްކަތްކުރަންޖެހެ އެވެ. ނަމަވެސް ބައެއް ފަރާތްތަކުން ބުނާ ގޮތުގައި ސިއްހީ ދާއިރާގެ ބައެއް ފަރާތްތަކުން 12 ގަޑިއިރު ވެސް މަސައްކަތްކުރަމުން ދެ އެވެ.
ޞިއްޙީ ޚިދުމަތްތެރީންގެ އަގު އެކި ފަރާތްތަކުން ވަޒަން ކުރަމުންދާއިރު ސަރުކާރުގެ އިސްވެރިން ވެސް ވަނީ އެބީދައިން ވާހަކަފުޅު ދައްކަވާފައެވެ. އެގޮތުން ޞިއްޙީ ޚިދުމަތްތެރީންނަށް ދަރަނިވެރިވެފައިވާ ކަމަށް ރައީސުލް ޖުމްހޫރިއްޔާވެސް ވަނީ ފާހަގަ ކުރައްވާފައެވެ.
ޞިއްޙީ ޚިދުމަތްތެރީންނާއި މެދު ކަންކަން ހިނގަމުންދާ ގޮތާއި ގުޅިގެން އެހެން ބައެއް ޤައުމުތަކުން ވެސް ހިމޭން އިހްތިޖާޖުތައް ދަނީ ފެންނަމުންނެވެ. އެގޮތުން މިހަފްތާގައި ބެލްޖިއަމްގެ ބޮޑުވަޒީރު އެގައުމުގެ ހޮސްޕިޓަލަކަށް ޒިޔާރަތް ކުރުމުން ޞިއްޙީ ޚިދުމަތްތެރީން މަރުޙަބާ ކިޔާފައިވަނީ ބޮޑު ވަޒީރަށް ފުރަގަސްދީގެންނެވެ. ޚިދުމަތަށް ބުރޫ ނާރުވާ އެމީހުން ކުރި އެ ހިމޭން އިހްތިޖާޖަކީ ޞިއްޙީ ޚިދުމަތްތެރީންގެ މުސާރަ ކުޑަވުމާއި ތަމްރީންވެގެން ތިބި ޚިދުމަތްތެރީންނަށް މަސައްކަތް ކުރުމުގެ ފުރުޞަތު ނުދީ ތަމްރީނެއް ނެތް މީހުން ޚިދުމަތަށް ނެރުމާއި ގުޅިގެން ކުރި އިޙްތިޖާޖެއް ކަމަށް ބޭރުގެ މީޑިއާތައް ރިޕޯޓްކޮށްފައިވެއެވެ.
