ހައިލަމް އޭޖީއަށް : ލައިވް ކުރަން ޖެހެނީ ވަކިބައެއްގެ ޝަރީޢަތެއްތޯ؟
ޝަރީޢަތް ލައިވް ކުރުމަކީ އިންސާފު ލިބޭނެކަމުގެ އިހްސާސް ކުރެވޭ ކަމެއް ކަމަށް ވިދާޅުވެ އެޓާނީ ޖެނެރަލް އިބްރާހީމް ރިފްޢަތު ދެއްކެވި ވާހަކަފުޅުތަކަށް ކުރީގެ ފަނޑިޔާރު އަޙުމަދު ޙައިލަމް ވިދާޅުވެއްޖެއެވެ.
ސްޕްރީމް ކޯޓްގެ ޝަރީޢަތްތައް އޮންލައިންކޮށް ފަށައި ޓްވިޓާއާއި ޔޫޓިއުބުން ލައިވްކުރަން ނިންމި ނިންމުމާއި ގުޅިގެން ރިފްޢަތު ވިދާޅުވެފައިވަނީ އެ ބަދަލަކީ ތާރީޚީ ބަދަލެއް ކަމަށާއި ޓެކްނޮލޮޖީ ބޭނުން ކުރުމުން ޚަރަދާއި ވަގުތު ސަލާމަތްވާނެ ކަމަށެވެ. އަދި ޝަރީޢަތް އަވަސްވެ އިންސާފު ހޯދަން ހިނގަންޖެހޭ މަގު ކުރު ވެގެންދާނެ ކަމަށާއި ކޯޓްތަކުގެ އަބުއިކަން މާޒީވެ ޝަރީޢަތުގެ އަޑާއި މަންޒަރު ދުރާއި ގާތުން ފެނިދެނިވުމުން އިންސާފު ލިބޭކަން އިހްސާސްވާނެ ކަމަށް އެމަނިކުފާނު ވިދާޅުވެފައިވެއެވެ.
މި ވާހަކަތަކަށް ރައްދު ދެއްވާ ، ރައީސް ޔާމީންގެ ޝަރީޢަތް ކުރިއަށް ގެންދެވި އަދި ޙުކުމް ކުރަން މަދު ގަޑިއިރުތަކަކަށް ވެފައި އޮއްވާ ސުލޫކީ މައްސަލައެއްގައި މަޤާމުން ވަކިކުރި ކްރިމިނަލް ކޯޓްގެ ފަނޑިޔާރު އަޙުމަދު ޙައިލަމް ވަނީ ރިފްޢަތަށް ސުވާލުތަކެއް ރައްދު ކުރައްވާފައެވެ. އެގޮތުން އިންސާފު ލިބޭކަން އިހްސާސްވަނީ ވަކި ބަޔަކު ލައިވްކުރީމަތޯ ހައިލަމް އައްސަވާފައިވެއެވެ. އަދި ލައިވް ކުރަންޖެހެނީ ވަކި ބައެއްގެ ޝަރީޢަތްތަކެއްތޯ ވެސް އެމަނިކުފާނު އައްސަވާފައިވެއެވެ.
އެހެންވެގެންތޯ ރާއްޖޭގައި ފުރަތަމަ ޝަރީޢަތެއް ލައިވްކުރަން އުޅުމުން ޖޭއެސްސީން ކަންބޮޑުވެގެން އުޅުނީ؟
ވަކި ބަޔަކު ލައިވްކުރީމަތޯ އިންސާފު ލިބޭކަން އިޙްސާސްވަނީ؟ ނޫނީ ލައިވްކުރަންޖެހެނީ ވަކިބައެއްގެ ޝަރީޢަތްތަކެއްތޯ؟ https://t.co/RFtTtd2qpr— Ahmed Hailam (@AhmedHailam) May 19, 2020
