ސިއްހީ މަސައްކަތްތެރިންނަށް އިތުރު ގަޑީގެ ފައިސާދޭ އުސޫލު ބަދަލުކުރަން ހެލްތު ޔޫނިއަނުން ގޮވާލައިފި
ސިއްހީ މަސައްކަތްތެރިންނަށް އިތުރު ގަޑީގެ ފައިސާ ދޭ ގޮތަށް ބަދަލު ގެންނައުމަށް މޯލްޑިވްސް ހެލްތު ޕްރޮފެޝަނަލް ޔޫނިއަން (އެމްއެޗްޕީޔޫ) އިން ސަރުކާރަށް ގޮވާލައިފި އެވެ.
މިިދިޔަ އާދިއްތަ ދުވަހު ފިނޭންސް މިނިސްޓްރީން ނެރުނު މުސާރައިގެ އާ އުސޫލާ އެކު، ސިއްހީ ހިދުމަތްތެރިންނަށް ގެއަށް ގެންދަން ލިބޭ ވަރު މަދުވެގެންދާނެ ކަމަށް ބުނެ ކޮވިޑް19ގެ ކަންކަމުގައި އެންމެ ބުރަކޮށް މަސައްކަތް ކުރައްވާ ޞިއްޙީ ޚިދުމަތްތެރީން އަންނަނީ މީސް މީޑިއާގައި އެކަމާ ހިތްހަމަ ނުޖެހުން ފާޅު ކުރަމުންނެވެ.
މިކަމާ ގުޅިގެން އެމްއެޗްޕީޔޫ އިން ނެރުނު ބަޔާނެއްގައި ބުނީ ކޮވިޑް-19 ގެ މި ހާލަތުގައި މަސައްކަތްކުރަން ޖެހުނުއިރު 19 ގިންތިއެއްގެ ސިއްހީ މަސައްކަތްތެރިން ތިބީ ވަޒީފާގެ ރައްކާތެރިކަމާއި އޮނިގަނޑެއް ނެތި އަސާސީ މުސާރަ އަށް އެންމެ 5،610ރ. ލިބޭ އުސޫލަކުން ކަމަށެވެ. އެކަން އެހެން އޮއްވައި، މިިދިޔަ އާދިއްތަ ދުވަހު ފިނޭންސް މިނިސްޓްރީން ނެރުނު މުސާރައިގެ އާ އުސޫލާ އެކު، ސިއްހީ ހިދުމަތްތެރިންނަށް ގެއަށް ގެންދަން ލިބޭ ވަރު މަދުވެގެންދާނެ ކަމަށް އެ ޖަމިއްޔާ އިން ބުންޏެވެ.
އިމަޖެންސީ މި ހާލަތުގައި ވެސް މަސައްކަތްތެރިންނަށް ލިބެންވާ އަސާސީ ހައްގުތައް ކަށަވަރުކޮށްދިނުމާއި ސިއްހީ ދާއިރާގައި މަސައްކަތްކުރާ ފަރާތްތަކާއި އެ މީހުންގެ އާއިލާތަކަށް ސީދާގޮތުންނާއި ނުސީދާގޮތުން ނޭދެވޭ އަސަރުކުރަމުންދާ ކަން ބަޔާނުގައި ފާހަގަކުރި އެވެ.
އެހެންވެ އިތުރުގަޑީގައި ކުރާ މަސައްކަތަށް ލިބެންޖެހޭ ފައިސާ ހިސާބުކުރާ ގޮތް ބަދަލުކުރަަން ފިނޭންސް މިނިސްޓްރީ އަދި ކަމާބެހޭ އިދާރާތަކަށް އެ ޖަމިއްޔާ އިން ގޮވާލާފައިވެ އެވެ.
"ފާއިތުވި އަހަރުތަކުގައި އަދި އާއްމު ހާލަތުގައި ވެސް ސިވިލް ސާވިސްގެ ސިއްހީ މަސައްކަތްތެރިންނަށް ކަނޑައެޅޭ މަސައްކަތު ގަޑީގެ އިތުރަށް ކުރާ މަސައްކަތަށް އިތުރުގަޑީގެ ފައިސާ ދެވެމުން އައި ކަމާއި ސިއްހީ މަސައްކަތްތެރިންގެ އާމްދަނީ ބިނާވަނީ އިތުރުގަޑީގެ ފައިސާއި އެހެނިހެން އެލަވަންސްތަކުގެ މައްޗަށް ކަމަށްވީ ހިނދު، މިފަދަ ސިއްހީ ކާރިސާއެއްގައި ފުރާނަ އަތްމައްޗަށް ލައިގެން، އާއިލާއާ ދުރުގައި ރެ އާއި ދުވާލު މަސައްކަތްކުރަމުން އަންނަ ސިއްހީ ހިދުމަތްތެރިންނަށް ލިބޭ ޖުމްލަ އާމްދަނީން ބައެއް އުނިވެގެން ދާގޮތަށް ސަރުކާރުގެ ފަރާތުން އެކުލަވައިލެވުނު އުސޫލު، މި ޔުނިއަނުން ބަލައިނުގަންނަ ވާހަކަ ދަންނަވަމެވެ،" ބަޔާނުގައި ބުނެފައިވެ އެވެ.
ޞިއްޙީ ޚިދުމަތްތެރީންގެ އަގު އެކި ފަރާތްތަކުން ވަޒަން ކުރަމުންދާއިރު ސަރުކާރުގެ އިސްވެރިން ވެސް ވަނީ އެބީދައިން ވާހަކަފުޅު ދައްކަވާފައެވެ. އެގޮތުން ޞިއްޙީ ޚިދުމަތްތެރީންނަށް ދަރަނިވެރިވެފައިވާ ކަމަށް ރައީސް އިބްރާހިމް މުހައްމަދު ސޯލިހު ވަނީ ފާހަގަ ކުރައްވާފައެވެ.
