ކޮވިޑާ ގުޅިގެން ދައުލަތުން ކުރާ ޚަރަދުތައް އޮޑިޓްކުރަން މަޖިލީހުން ފާސްކޮށްފި
ކޮވިޑް-19ގެ ހާލަތުން އަރައިގަތުމަށް ދައުލަތުން ކުރަމުންދާ ޚަރަދާއި، ދަރަންޏާއި މާލީ އެހީގެ ގޮތުގައި ލިބޭ ފައިސާ ޚަރަދުކުރާ ގޮތުގެ ފައިނޭންޝަލް އޮޑިޓެއް ހެދުމަށް ރައްޔިތުންގެ މަޖިލީހުން ފާސްކޮށްފިއެވެ.
މަޖިލީހުގެ ނާއިބު ރައީސް އީވާ ޢަބްދުﷲ ހުށަހެޅުއްވި މި އިސްލާހުގައި ވަނީ ކޮވިޑް-19 ގެ ސަބަބުން ދައުލަތުގެ މުއައްސަސާތަކުން ކޮންމެ ކްއާޓަރެއްގައި ކުރާ ހަރަދުތަކާއި ހިލޭ އެހީއާއި ދަރަނީގެ މާލީ ރިޕޯޓުތަކުގެ ފައިނޭޝަލް އޮޑިޓެއް ހަދާށެވެ. ކޮންމެ ކްއާޓަރެއް ނިމޭތާ މަސް ދުވަހުގެ ތެރޭގައި އެ އޮޑިޓް ނިންމަން އޮޑިޓާ ޖެނެރަލްގެ އޮފީހަށް އަންގަން ވެސް އެ އިސްލާހުގައިވެ އެވެ. ކްއާޓަރަކީ ތިން މަސް ދުވަހެވެ.
އަދި ބަލިމަޑުކަމުގެ މިފަދަ ދަނޑިވަޅެއްގައި ހާއްސަ އަހައްމިއްޔަތެއް ދީގެން އޮޑިޓެއް ކުރުމަކީ ބައިނަލްއަގްވާމީ އޮޑިޓް ނިޒާމުގައި ބާރުއަޅާކަމެއްކަމަށާއި، ދައުލަތުގެ މާލިއްޔަތާއި މިލްކިއްޔާތާއި ދަރަނި އޮޑިޓްކުރުމަކީ ގާނޫނު އަސާސީއާއި އޮޑިޓަރ ޖެނެރަލްގެ ޤާނޫނުން އޮޑިޓަރ ޖެނެރަލަށް ލާޒިމްކޮށްފައިވާ ކަމެއް ކަމަށް އެ އިސްލާހުގައި ވެއެވެ.
އީވާ ހުށައެޅުއްވި އިޞްލަޙާއެކު ކޮމިޓީގެ ރިޕޯޓް ފާސްވީ ވޯޓްގައި ބައިވެރިވެވަޑައިގެންނެވި 63 މެންބަރުންގެ ވޯޓުންނެވެ. އިސްލާހު ފާސްކުރަން ނުފެންނަ ކަމަށް އެއްވެސް މެންބަރަކު ވޯޓެއް ނުދެއްވަ އެވެ. ވަކި ގޮތަކަށް ވޯޓު ދެއްވަން ބޭނުން ނުވާ ކަމަށް އެއް މެންބަރަކު ވޯޓު ދެއްވި އެވެ.
ކޮވިޑް-19ގެ ސަބަބުން އާއިލާތަކާއި ވިޔަފާރިތަކުގެ އާމްދަނީއަށް އަންނަ ނުރަނގަޅު ބަދަލުތަކުން އަރައިގަތުމަށް ސަރުކާރުން ހިންގުމަށް ނިންމާފައިވާ ޕްރޮގްރާމް މަޖިލީހުގެ 12 ކޮމިޓީއަކަށް ދިރާސާކުރުމަށް ވެސް ހުށައަޅާފައިވެއެވެ.
