ސިއްހީ ހިދުމަތްތެރިންގެ މުސާރަ ކުޑާވާ ގޮތަށް އުސޫލު ބަދަލުކޮށްފައިވާތީ ކަންބޮޑުވޭ: އިދިކޮޅު
ސިއްހީ ހިދުމަތްތެރިންގެ މަސައްކަތުގެ ގަޑިއަށް ބަދަލުގެނެސް އާމްދަނީން ބައެއް އުނިވާގޮތަށް ހަދާފައިވާކަމަށް ބުނެ އިދިކޮޅު ކޯލިޝަނުން ކަންބޮޑުވުން ފާޅުކޮށްފި އެވެ.
މިިދިޔަ އާދިއްތަ ދުވަހު ފިނޭންސް މިނިސްޓްރީން ނެރުނު މުސާރައިގެ އާ އުސޫލާ އެކު، ސިއްހީ ހިދުމަތްތެރިންނަށް ގެއަށް ގެންދަން ލިބޭ ވަރު މަދުވެގެންދާނެ ކަމަށް ބުނެ ކޮވިޑް19ގެ ކަންކަމުގައި އެންމެ ބުރަކޮށް މަސައްކަތް ކުރައްވާ ޞިއްޙީ ޚިދުމަތްތެރީން އަންނަނީ މީސް މީޑިއާގައި އެކަމާ ހިތްހަމަ ނުޖެހުން ފާޅު ކުރަމުންނެވެ.
މިކަމާ ގުޅިގެން ޕީޕީއެމް/ޕީއެންސީ ކޯލިޝަނުން ނެރެފައިވާ ބަޔާނެއްގައި ބުނެފައިވަނީ ސިއްހީ ހިދުމަތްތެރިންގެ މަސައްކަތުގެ ގަޑިއަށް ބަދަލުގެނެސް އާމްދަނީން ބައެއް އުނިވާގޮތަށް ހަދާފައިވާކަމުގެ މައުލޫމާތު އެ ކޯލިޝަނަށް ލިބިފައިވާ ކަމަށާއި، އެކަމާއި މެދު ކަންބޮޑުވާކަމަށެވެ.
އެ ބަޔާނުގައި ބުނެފައި ވަނީ އާންމު އުސޫލުގެ މަތިން ރޯދަ މަހު ސަރުކާރުގެ މުވައްޒަފުންގެ ރަސްމީ ގަޑިއަކީ ހަތަރު ގަޑިއިރު ކަމަށާއި ހަތަރު ގަޑިއިރުގެ އިތުރުން މަސައްކަތް ކުރަންޖެހިއްޖެ ނަމަ އޮންނަ އުސޫލުގެ މަތިން އިތުރުގަޑިގެ ފައިސާ ހައްގުވާނެކަމަށެވެ.
އަދި ކޮވިޑް19 ގެ ކަންކަމުގައި ސިއްހީ ހިދުމަތްތެރިން މަސައްކަތް ކުރަމުން ދަނިކޮށް މަސައްކަތު ގަޑިއަށް ބަދަލުގެނެސް އުސޫލު ބަދަލުކުރުމަކީ ހިތާމަކުރާކަމެއް ކަމަށް އިދިކޮޅުން ބުނެއެވެ.
އިދިކޮޅުން ވަނީ ފްރަންޓްލައިންގައި މަސައްކަތް ކުރާ ފަރާތްތަކުގެ މުސާރައަށް އެއްވެސް ބަދަލެއް ނުގެނައުމަށް ސަރުކާރަށް ގޮވާލާފައެވެ.
Ads by STO
