ކަދުރު ބޭނުންވާ ފަރާތްތަކުން ނަން ނޯޓު ކުރަން އެއް ދުވަސް
މާލެ އަދި ވިލިމާލޭގެ ފަގީރުންނަށް ބެހުމަށްފަހު ބާކީހުރި ކަދުރު ބޭނުންވާ ފަރާތްތަކަށް ބެހުމަށް މާލެ ސިޓީ ކައުންސިލުން ނިންމައިފިއެވެ. އަދި ބޭނުންވާ ފަރާތްތަކުން އެ ކައުންސިލުގައި ނަންނޯޓު ކުރުމަށް އެއް ދުވަހުގެ މުހުލަތެއް ވަނީ ދީފައެވެ.
މާލެ ސިޓީ ކައުންސިލުން ބުނީ ފަގީރުންނަށް ބެހުމަށް ފަހު 2903 ޕެކެޓު ބާކީ ވެފައިވާ ކަމަށެވެ. އަދި މާލެއާއި ވިލިމާލޭގައި ދިރިއުޅޭ ފަރަތްތަކުގެ ތެރެއިން ކަދުރު ހޯދުމަށް އެދޭ ފަރާތްތަކުން މި މަހުގެ 21 ވަނަ ދުވަހުގެ ނުވައެއްގެ ކުރިން މައުލޫމާތު ފޮނުވައި ދިނުމަށް ކައުންސިލުން ވަނީ އެދިފައެވެ.
ނަން ނޯޓު ކުރުމަށް ހަމަޖެހިފައިވަނީ 9955788 ނަންބަރަށް މައުލޫމާތު އެސްއެމްއެސް ކޮށްގެންނެވެ. އަދި ކަދުރު ދޫކުރުމުގައި ބަލާނީ ކަދުރު ހުސްވަންދެން ފުރަތަމަ އެސްއެމްއެސް ކުރާ ފަރާތްތަކަށް ކަމުގައި ވެސް އެ ކައުންސިލުން ބުނެފައިވެއެވެ.
އެހެނިހެން އަހަރުތަކެކޭ އެއްފަދައިން ސައުދީން ވަނީ މި އަހަރުވެސް ދިވެހިރާއްޖެއަށް 50 މެޓްރިކް ޓަނު ކަދުރު ހަދިޔާކޮށްފައެވެ.
